Ƙamusu

Harsashi - Tana nufin tushe. Misali; An dasa harsashin gina makarantar islamiyya a yankin mu. ENG; Foundation (A turance tana nufin harsashi)

Harshe - Tana nufin gaɓar da ake magana da ita wadda take cikin baki. Misali; Ya tauna harshe yayin da yake cin abinci. ENG; Tongue (A turance tana nufin harshe)

Harzuƙa - Tana nufin saurin fushi. Misali; Ya harzuƙa da yawa shi yasa ya kai masa naushi. ENG; Become Suddenly Angry (A turance tana nufin harzuƙa)

Hasara - Tana nufin rasa wani abu. Misali; Sun yi hasara sakamakon ambaliyar ruwan da ta afku a yankin su. ENG; Misfortune/Loss (A turance tana nufin hasara) Kishiyarta; Riba

Haske - Tana nufin abin da ke fitowa idan rana ta fito kuma yake gushewa idan ranar ta faɗi. Misali; Haske ya mamaye ɗakin sakamakon kunna fitilar da Laure ta yi. ENG; Light (A turance tana nufin haske) Kishiyarta; Duhu

Hassada - Tana nufin jin ƙyashi ko baƙin ciki idan wani ya samu abin alkhairi ko cigaba ko ɗaukaka da sauransu. Misali; Daga cikin munanan ɗabi'u akwai hassada da kuma ƙarya. ENG; Envy (A turance tana nufin hassada)

Hasumiya - Tana nufin wani siririn gini mai tsawo da ake yi a masallaci ko majami'a. Misali; An fara gyara fentin hasumiyar masallacin unguwar mu. ENG; Tower (A turance tana nufin hasumiya)

Hatimi - Tana nufin wata shaida ko alama. Misali; Wasiƙar tana ɗauke da hatimin sarki. ENG; Seal (A turance tana nufin hatimi)

Hatsabibi - Tana nufin mutum mai ɗabi'un ban mamaki ko wanda yake abubuwan tsautsayin da ba kowa ne zai iya ba. Misali; Jauro hatsabibi ne, jiya ya shiga dajin da ba kowa ne yake shiga ya fito lafiya ba. ENG; Person with extra ordinary ability (A turance tana nufin hatsabibi)

Hatsaniya - Tana nufin cacar baki ko cece-kuce. Misalil; Mata da mijin sun yi hatsaniya har ta kai matar ta yi yaji. ENG; Loud Argument (A turance tana nufin hatsaniya)