Ƙamusu

Bigire - Tana nufin guri ko gurbi. Misali; Idan mutum yana sallah ana so ya kalli bigiren sujjadar sa. ENG; Place (A turance tana nufin bigire)

Biki - Tana nufin tara mutane su ci su sha saboda taya murnar wani abin farin ciki da ya samu. Misali; Zan je biki gobe da yamma, ƙanwata ce za ta yi aure. ENG; Celebration (A turance tana nufin biki)

Biko - Tana nufin neman dawo da matar da ta yi yaji (wadda ta yi fushi ta bar gidan mijinta). Misali; Kawu ya tafi bikon matar yaya Ado. ENG; Attempt to reconcile run-away wife (A turance yana nufin biko)

Bilimbituwa - Tana nufin neman abu a rasa a yi ta bulayi, ko kuma neman da babu sakamako. Misali; Mafarautan bilimbituwa kawai za su yi a dajin saboda babu namun daji yanzu. ENG; Fruitless search (A turance tana nufin bilimbituwa)

Bincike - Tana nufin ƙoƙarin gano wani abu. Misali; 'Yan sanda na bincike don gano masu aikata laifi. ENG; Investigation (A turance yana nufin bincike)

Bindiga - Tana nufin na'aurar harbi musamman ga mayaƙa ko maharba ko jami'an tsaro. Misali; Sojoji sun kama wani matafiyi da bindiga a hanyar Sokoto. ENG; Gun (A turance tana nufin bindiga)

Bini-Bini - Tana nufin akai-akai. Misali; Abokina bini-bini ya zo gidanmu, hakan ya sa mun shaƙu. ENG; Repeatedly (A turance tana  nufin bini-bini)

Binne - Tana nufin a haƙa rami a sa abu a rufe. Misali; An binne mamacin a maƙabartar cikin gari. ENG; Bury (A turance tana nufin binne)

Birgima - Tana nufin a yi ta juyi a ƙasa. Misali; Yaron yana ta birgima don an hana shi fita wasa. ENG; Rolling on the ground (A turance yana nufin birgima)

Biri - Tana nufin dabba mai yanayin siffar mutum. Misali; Da muka je gidan ajiye namun daji mun ga biri da kura. ENG; Monkey (A turance tana nufin biri)