Ƙamusu

Kucaki - Tana nufin mutum mara tsafta. Misali; Wani kucaki ne a bakin kasuwa yake siyar da gwangwanaye. ENG; Slovenly Person (A turance tana nufin kucaki)

Kudu - Tana nufin wani ɓangare daga cikin ɓangarori. Misali; Gabas ake kallo idan za a yi salla ba kudu ba. ENG; South (A turance tana nufin kudu)

Kududdufi - Tana nufin ƙaton rami da ake samu a ƙauyuka da bayan gari, idan damina ta zo yakan cika da ruwa. Bayan damina kuma akan ɗibi yashi ko ƙasar gurin a yi amfani da ita. Misali; Kafin mutane su yi gine-gine ƙaton kududdufi ne a gurin. ENG; Burrow-Pit (A turance tana nufin kududdufi)

Kufai - Gurbi na ramuka ko koguna ko gine-ginen da suke nuna cewar mutane sun taba wanzuwa/zama a wurin a  zamunnan  baya.

Kufta - Tana nufin taguwa mai tsayin da ya haura gwuiwa, tana da aiki a wuyan da bakin aljihu da kuma hannun rigar. Misali; Ɗinkin kufta ya yi tsada ba kowa ne yake iya yi ba. ENG; A three-quarter length taguwa with embroidery around the neck and sleeves (A turance tana nufin kufta)

Kuje - Tana nufin jin ciwo a saman fata. Misali; Amir ya faɗi ya kuje a gwuiwa. ENG; Scratch (A turance tana nufin kuje)

Kujera - Tana nufin abin da ake zama a kai. Misali; Inna ta siyo sabuwar kujera. ENG; Chair (A turance tana nufin kujera)  

Kuka - Tana nufin koren ganyen bishiyar da ake amfani da shi don yin miya, yana da sinadarai masu matuƙar amfani a jiki. Misali; Miyar kuka na ɗaya daga cikin miyoyin Hausawa na gargajiya. ENG; Baobab Tree (A turance tana nufin kuka)

Kuka - Tana nufin zubar hawaye daga idanu sakamakon murna ko ɓacin rai. Misali; Safiya ta sha kuka lokacin da mahaifinta ya rasu. ENG; Crying (A turance tana nufin kuka)

Kuku - Tana nufin wanda yake aikin dafa abinci. Misali; Gidan attajirai ne ake ajiye kuku. ENG; Cook (A turance tana nufin kuku)