Idan ka ji ance Gaye ya iya ɗaukar wanka. To ana nufin saurayi ya haɗu sosai. Wato dai ana nufin ya iya ado da kwalliya.
Iya tsaftace ko’ina na jiki. Da ɗanɗasa ado da kwalliya ga maza da mata. Yana matuƙar tasiri na fizgar Zuciya .
Akwai bambanci tsakanin ado da kwalliya na maza da mata. Za mu ɗan yi taƙaitaccen bayanin kowanne.
Yanayin shiga yana nuna wa mutane yadda kake. Irin halaye da tarbiyyar mutum. Haka ma ana girmama mutum, saboda irin yadda ya mutunta kansa wajen sutura.
Kai hatta a wajen aiki ko kasuwanci, ado da kwalliya na taimaka wa mutum sosai.
A wajen ado da kwalliya ba a bayyana tsiraici. Al’aurar namiji ta fara daga cibiyarsa zuwa gwuiwoyinsa. Mace kuwa duk jikinta Al’aura ce,in ban da fuska da tafukanta.
YADDA AKE ADO DA KWALLIYA NA MAZA :
TSAFTA: Wanka, da aske gashin hammata, da asiwaki da kuma yanke farce(ƙumba). Na sawa ka haska.
ƊINKI: Kaftan doguwa, da shakwara da jamfa, da ƙananan kaya na Turawa.
HULA : Akwai huluna na dinki, Dara, Zanna, da dai Sauransu. Hula ta sha wanki ta ji sitati.
ASKI: Yin aski, kar a bar suma ta dunƙule kamar bargo.
AGOGO: Sanya agogo da zobe na azurfa. Kwalliya ce ta Maza. Haramun ne namiji ya sa zobe na Zinariya ( Gwal) .
TAKALMI : Yana da muhimmanci a cika ado da kwalliyar mazaje.
Kowacce Mace za ta iya zama tauraruwa, a dalilin iya ado da kwalliya. Idan na ce tauraruwa, Ina nufin kyakkyawar gaske wacce haskenta yake tasiri harma da janyo soyayya.
Shi ne ta ɗauki adonta da kwalliya a matsayin ibada. Wato ta ɗauke su dole ne, kuma tana samun lada a ciki.
Iya ɗaukar wanka, a tsaftace ko’ina na jiki. Da ƙawata jikin da kwalliya. Da yin ado na da matukar tasirin fizgar zuciya ɗan Adam.
Haka ma dai yana ƙara wa mace daraja, ƙima, da mutunci.
Kai ko budurwa ce sai ka ga ta zama mai farin jini sosai.
Har mijinta yai ta yawan son ganinta. Ya dinga samun natsuwa. Yana zama a gidansa
YADDA AKE ADO DA KWALLIYA NA MATA :
1- TSAFTA: Zama mai tsaftace jiki da tsaftar sutura ne farko. Hausawa sun ce “in kana da kyau, ka ƙara da wanka.
2- ƘUNSHI: Ƙunshi na fidda Mace tai kwarjini a cikin adonta. Jan ƙunshi na lallen gargajiya, da baƙin ƙunshi na zamani (na kanti) .
3- GYARAN GASHI: Ya haɗa da wanke gashi, da turara gashi (steaming), da shafa mai, da kitso da dai Sauransu.
4- FATAR JIKI : Amfani da Dilka, da kurkum, da ganyaye na sa fata tai kyawu sosai.
5- KWALLIYAR FUSKA : Yin kwalliya da tozali ( kajal ), hoda, Jan baki, na canja ki kacokan daga babba zuwa yarinya. Haka ma nan take ya mai da ke tsaleliya.
6 – KALA : Tantancewa da irin launikan da suka fi karɓar ki. Yana ba ki haske na musamman.
7 – KALLABI : Iya canja ɗauri, ɗan kwali na da ban mamaki. Har sawa yake a biki da kallo. A zamanance akwai Goggoro, da yadika daban-daban na ɗauri.
8 – ƊINKI : Yanayin yadda maɗinka ke zubo da basirarsu. Na taimakawa kwarai wajen fito da kyawun sutura. Dogayen riguna.
SARKA : Sanya sarka, da ɗan kunne, da zobe da awarwaro su na fidda mace .
KAMUN KAI : Kamun kai na bai wa Mace daraja da ƙima.
A ƙarshe ado da kwalliya na da muhimmanci. Amma fa wani mafi muhimmanci shi ne murmushi. Ko da babu kwalliya, murmushi na sa a ga kyawun mutum. ɗandashi! A ce ga murmushi ga ado da kwalliya.
Amma fa mu yi hattara kar garin neman gira, a rasa ido.
Ka da mu saɓa wa Shari’ar addinimu. Kuma ka da mu cutar da kanmu.
Babu mutum mummuna sai ƙazami, wanda ba ya ado da kwalliya.
Tsafta, ado da kwalliya na ƙara soyayya da kawo natsuwa a tsakanin ma’aurata.
Ance Imam Alqama ya kan yi ado ya zauna a gida. Da aka tambaye shi, sai ya yi hujja da wannan ayar ta cikin suratu Baqara:228.
Imam ya ce : ” Tun da ina so iyalaina su yi min ado, shi ya sa ni ma nake yin ado in zauna a cikinsu.
Wato yadda ado da kwalliya ke da muhimmaci wajen Mace, haka yake ga Namiji. domin karin bayani danna kuren rubtun dan duba yadda ake Maraba da Mai gida
Litattafai da aka duba
