WikiHausa

Tag: yadda ake

  • Yadda Ake Shinkafa Da Miyar Attaruhu

    Yadda Ake Shinkafa Da Miyar Attaruhu

    Shinkafa Da Miyar Attaruhu: Shinkafa da miyar attaruhu abinci ne da aka fi yawan cin sa da rana; musamman saboda gina jiki da kuma samar da kuzari…

    Kayan Haɗi:

    1. Shinkafa
    2. Attaruhu
    3. Albasa
    4. Koren tattasai
    5. Ƙwai
    6. Plantain
    7. Mangyaɗa

    Yadda Ake Haɗawa

    Da farko uwar gida za ki ɗora ruwa a wuta, idan ya tafasa sai ki zuba shinkafa. Idan ta yi rabin dahuwa, sai ki sauke ki wanke ta; ki tace ki mayar tukunya, kisa ruwa kaɗan yadda zai turara ta; amma fa kar ya yi yawa don ba a son shinkafar ta caɓe, sai ki rage wuta.

    Sai ki ɗauko attaruhu ki wanke ki jajjaga, sai ki sa albasa ita ma a yanka ta, yankan tsaye ki wanke ta; ki bar ta a kwando ta tsane, sannan ki ɗauko koren tattasai, ki yanka shi, ki ajiye a gefe.

    Sai ki ɗauko plantain ki ɓare, ki yanka ta, sai ki koma kan shinkafarki; idan ta turara sai ki sauke ki bar ta a tukunyar ta ɗan sha iska, kafin ki zuba a plaks,

    Sai ki ɗauko kasko ko tukunya ki zuba mai ki soya plantain ɗin nan ki ajiye a gefe. Sannan ki ɗauko tukunyar da za ki yi miyarki a ciki, ki zuba mai; idan ya yi zafi, sai ki sa albasa idan ta yi brown, sai ki zuba attaruhun da kika jajjaga da albasa da koren tattasan. Sai ki juya za ki iya sa farin maggi kaɗan idan kina so,

    Sai ki sa maggi mai star da sauran kalolin maggin da kike so, ki sa seasoning mai daɗi, sai ki zuba citta da kanunfari kadan; wanda dama already ana so mace ta dake citta, kanunfari, masoro, gyaɗar Yarbawa mai ƙamshi da tafurnuwa ta dake abinta, ta zuba a roba idan za ki yi jar miya ko jallop sai ki saka.

    To bayan kin zuba sai ki juya sosai, idan miyar ta soyu, sai ki rufe ki rage wutar ki bar shi zuwa minti ɗaya, da kin bude za ki ga miyar ta kwanta, kayan miyan sun haɗe jikinsu. Sai ki sauke ki ɗora ruwa, ki dafa ƙwai idan ya huce, sai ki ɓare shi, ki kwashe shinkafarki, sai ki zuba a plet; sai ki sa miyar a gefe ki zuba plantain ɗinma a gefe, sannan ki sa ƙwanki a gefe; ki ɗanyi musu decoration mai kyau. Shi kenan girkinki ya kammala sai ci.

    Domin karanta yadda ake Yadda Ake Shinkafa ‘Yar Senegal ko Yadda Ake Yin Alalan Shinkafa danna nan.

  • Yadda Ake Turaren Wuta Na Musamman

    Yadda Ake Turaren Wuta Na Musamman

    Turaren wuta ana yin sa ne da itace, domin turara ɗaki, da dukkanin jiki da na tsugunno, da kuma na sutura . Ana zuba shi cikin gaushi (garwashi) ne a kasko. Nan da nan kuwa ka ji ƙamshi ya gauraye ko’ina a cikin gida. Daga cikin Itatuwa da ake turare da su kuwa Sun haɗa da:
    Icen Sandal
    Ice, Hawi
    Icen Gab-Gab
    Icen Durot
    Da dai Sauransu.

    Ana yin turare na soyawa kuma ana yin na jiƙawa. Ya danganta da buƙatar mutum.

    Larabawa da kuma mutanen Maiduguri ne suka fi shahara wajen amfani da turaren wuta. Mazansu na taimakawa sosai, su siya wa matansu turare akai-akai. A wajensu tamkar dole ne amfani da turare . Mace ba ta da daraja sai da kasancewa cikin ƙamshi a kodayaushe .

    KAYAN TURAREN WUTA
    Icen Hawi
    Matan Arewa
    Farce
    Misik
    Alhaji Abdullahi
    Salamalekum
    Sasorabia
    20 fragrances
    Madara turare ( 8)

    YADDA AKE HAƊAWA
    Za a sa icen Hawi a turmi a daddaka shi sama-sama. A sa icen gab-gab shima haka. Sai a juye su cikin mazubi. A dauko ruwan turare Matan Arewa a zuba a kan itatuwa. A juye Soyayyen farce. A zuba Misik. Sai a ɗauko turaruka: Alhaji Abdullahi, da salamalekum, da Sasorabia, da 20 fragrances. Kowanne a buɗe a juye. Sai kuma a dauko madarar turare masu matukar ƙamshi a zuba su. A juya da kyau ko’ina ya samu ya haɗe . A samu mazubi a juye a ciki. Kuma a rufe shi sosai.

    Littattafai da aka duba:

    Taron karawa juna ilmi.

    Hikimomin Kulawa da Mai gida.

    Mu Koyi Sana’a.

    7th Nuwanba, 2015,
    Gidan Mumbayya, kano.

  • Yadda Ake Dashishi

    Yadda Ake Dashishi

    Dashishi abincin ne da ake yin sa daga alkama. Dashishi abincin gargajiya ne a Arewacin Nijeriya, yana da matuƙar lafiya a jiki, musamman ma a wajen masu ciwon siga kasancewar alkama na ɗaya daga cikin abincin masu ciwon siga.

    Abubuwan da ake buƙata:

    • Alkama
    • Gishiri
    • Mai
    • Albasa

    Yadda ake haɗawa

    1. A wanke alkama sosai, a fitar da dukkan harkakinta.
    2. Sai a surfa ta, watau a cire dusar alkamar, sai a bakace a wanke a sake shanyawa.
    3. Idan ta bushe sai a ɓarza ta, sai a ɗaura tukunya da madambaci sai a shimfiɗa buhu mai kyau, wanda aka wanke shi, amma fa buhun mai shara-shara.
    4. Wanke alkamar a tsane ta sosai, a zuba a cikin wannan buhun da aka shimfiɗa a cikin tukunyar.
    5. Sai a rufe da faifai a bar shi ya yi kamar 20mnts.
    6. Sai a sauke a wanke shi bayan an wanke, sai a yi mashi hadi a sa gishiri da albasa da mai idan dashishi da miya ce, sai a maida a tukunya ya ƙarasa dahuwa, za  a iya ƙara masa 15-20mnts za a ji ma yana ƙamshi, sai a sauke ya yi, sai ci.

    Domin karanta Yadda Ake Shinkafa ‘Yar Senegal danna nan.

  • Yadda Ake Koko

    Yadda Ake Koko

    Koko abinsha ne na karin kumallo na hausawa, wanda ake yin sa daga gero. Koko na da daɗin sha, ga matuƙar amfani a jiki.

    Abubuwan Da Ake Buƙata

    Gero
    Citta
    Barkono
    Kanunfari

    Yadda Ake Haɗawa:

    1. A jiƙa gero ya jiƙu sosai, sai a zuba citta, kanunfari da ɗan barkona kaɗan, sai a niƙa.

    2. Sai a tace shi da abin tata, a fitar da dusar da gasarar, sai a bar shi ya kwanta.

    3. A tafasa ruwa a kwano daban, kuma sai a ɗebi kwantacciyar gasarar nan, sai a ƙara mata ruwa a juya ta ɗan yi kauri kaɗan.

    4. Sai a sheƙa mata wannan tafashasshen ruwan zafin da sauri sai a motsa kaɗan.

    Domin sanin yadda ake burabusko danna koren rubutun nan.

  • Yadda Ake Kunun Gyaɗa

    Yadda Ake Kunun Gyaɗa

    Kunun gyaɗa na ɗaya daga cikin abin sha mai daɗi da amfani a jikin ɗan Adam.

    Abubuwan da ake buƙata;

    Farar shinkafa

    Ɗanyar gyaɗa 

    Sugar daidai misali

    Yadda ake haɗawa

    A gyara farar shinkafa sai a wanke ta, a tsane tsaf. Bayan haka, a soya gyaɗa sama-sama a murje, bayan an bushe, sai a markaɗa, bayan an markaɗa a tace.

    Sai a zuba tataccen ruwan gyaɗar a tukunya, in ya tafasa, sai a ɗauko wanna shinkafar da aka wanke aka tsane, sai a zuba ta a ciki, su yi ta dahuwa har sai ta dahu sosai.

    Don gudun kada ya tsinke, za ki iya zuba ruwan lemon tsami kaɗan. Idan kuma an ga bai yi kauri ba, sai ki ɗan ɗibi gasarar koko a dama da ruwan sanyi sai a zuba a juya sosai zai yi kauri.

    Domin sanin Yadda Ake Soyayyiyar Gyaɗa danna koren rubutun nan.

  • Yadda Ake Tsaba Da Wake

    Yadda Ake Tsaba Da Wake

    Abubuwan Buƙata

    Gero

    Wake

    Kuli

    Maggi

    Gishiri

    Citta

    Kanunfari

    Barkono

    Cucumber

    Tomato

    Albasa

    Cabbage

    Man gyaɗa

    Yadda Ake Haɗawa:

    Ki samu surfaffen geronki, Wanda babu dusa a jiki, sai ki wanke shi, ki rege shi, da koko saboda tsakuwa sai ki tsame shi a ruwa, ki ɗan sami ruwa mai kyau, ki zuba mishi yadda zai riƙa jiƙuwa. Dama kin gyara wakenki, kin wanke shi.

    Sai ki tsaida sanwa ki zuba waken in ya yi rabin dahuwa, sai ki zuba geronki ki sa maggi da ɗan gishiri ki juya kada ki bari ta kama, za ki riƙa dubawa akai-akai, in ruwa bai isa ba, sai ki ƙara

    Amma ba a son ruwa ya mata yawa in ta dahu sai ki sauke, dama kin tanadi dakakken ƙulinki wanda kika dake shi da kayan ƙamshi da barkona da maggi & gishiri, dama kin soya man gyadarki, a gefe kuma ga cabbage, cucumber, albasa, tomato waɗanda kika yanka su ƙanana. Bayan haka, sai ki samu mazubi mai kyau da za a zuba wa mai gida,

    Sai ki jejjera su cabbage ɗin akai, ki kawo wannan ƙulin, ki zuba kina barbaɗawa sai ki zuba man gyadar, shi kenan a ci lafiya.

    Domin karanta Yadda Ake Noman Wake danna nan.

  • Yadda Ake Burabusko

    Yadda Ake Burabusko

    Burabusko: Burabusko abincin gargajiya ne, wanda ya samo asali daga Barebari; wanda ake yin shi da gero.

    Gero na ƙunshe da sinadiran calcium, copper, iron, magnesium, manganese, selenium, potassium, phosphorus da kuma bitamins kamar su niacin, riboflabin, pantothenic, folate, folic acid, bit B6, bit C, bit E.

    Abubuwan Da Ake buƙata:

    1. Gero
    2. Mai
    3. Gishiri

    Yadda Ake Haɗawa

    A wanke gero a shanya shi ya bushe sai a ɓarza shi,

    A ɗora ruwa a kan wuta kamar rabin tukunya, sai a kawo madambaci a ɗora a kan tukunyar; sai a shimfiɗa buhu a kan madambaci.

    Sai a kawo ɓarzajjen geron da kika bakace aka fitar da dusar a zuba a cikin madambacin; a yayyafa ruwa a kai, Idan ana so ma, ana iya jiƙa kanwa ‘yar kaɗan a yayyafa ruwa a kan geron saboda ya yi laushi sosai.

    Sannan a bar shi ya turaru, Idan ya ɗauko turaruwa za a ga ya fara curewa,

    Sai a sauke daga kan wuta, a zuba mai da gishiri ko maggi a mutsittsika; domin ya warware a rage ruwan da yake cikin tukunyar, a bar shi daidai yadda zai yi.

    A ɗauko turarren geron a zuba a cikin ruwan, sai a ɗan juya kamar ana ruɗe,

    Amma wannan da ƙauri. Sai a kawo leda a rufe, sannan a kawo murfin tukunya a ɗora a kai. Idan ya yi, za a ji gida ya turare da ƙamshi, kuma idan an taɓa za a ji ya yi laushi.

    Domin sanin Yadda Ake Dashishi danna koren rubutun nan

    Domin sanin Yadda Ake Hada Lemon Gyada, Shinkafa Da Dankalin Hausa (Groundnut, Rice, Sweet Potato Shake) danna koren rubutun nan.

  • Yadda Ake Kunun Kwakwa Ga Masu Ciwon Siga

    Yadda Ake Kunun Kwakwa Ga Masu Ciwon Siga

    Kunun kwakwa yana ɗaya daga cikin abin sha mai riƙe ciki, sannan ba shi da wahalar narkewa a ciki.

    Yana rage hawan suga ga masu ciwon suga, ruwan kwakwa yana wanke koda da samun fitar fitsari cikin sauri da inganta aikinta wajan tace abubuwa da sauransu.

    Abubuwan da ake buƙata:

    Kofi ɗaya na Farar shinkafa
    Kofi ɗaya na Kwakwa
    Kofi ɗaya na Gyada
    Kofi ɗaya na Madara
    Sai a zuba ruwan zuma gwargwadon yadda ake buƙata ko sikarin da suke amfani da shi na masu ciwon siga.

    Yadda ake haɗa kunun kwakwa

    1. Da farko za a wanke shinka fara, sai a jiƙa ta da ruwan zafi tsawon minti talatin (30)

    2. Sai a jiƙa gyadar, a surfa ta, a wanke ta (kamar yadda ake wanke wake).

    3. Sai a juye su (Shinkafa, gyaɗa, kwakwa) a abin da za a markaɗa (blender). A zuba ruwan kwakwar a yi blending sosai; (Za a iya ƙara ruwa idan ruwan kwakwar bai isa ba)

    4. Sai a tace a ɗaura a tukunya a yi ta juyawa har sai an ga ya yi kauri.

    5. Sai a zuba zuma ko sikarin masu ciwon siga (gwargwadon yadda ake buƙata) da madara kofi ɗayan nan a motsa. Sai a kashe wutar, a bar shi ya kama jikinsa kamar na minti biyar

    Wannan abin shan, yana da kyau ga masu ciwon siga da ‘yan sama da shekara arba’in (40). Su mayar da shi abincin darensu, domin ƙarin lafiyarsu.

    Domin sanin yadda ake Buredin Kwakwa danna koren rubutun nan.

    Domin sanin yadda ake Yadda Ake Biredin Gyaɗa (Groundnut Bread) danna koren rubutun nan.

  • Yadda Ake Taimama

    Yadda Ake Taimama

    Taimama hanyar da ake yin tsarki ce idan an rasa ruwa, ta hanyar amfani da ƙasa; ana shafar fuska da hannaye biyu da ƙasa mai tsarki, da niyyar ɗahara.

    Ga bayani dalla-dalla yadda ake taimama:

    1 – A doki ƙasa da hannayensa biyu, bugu ɗaya.

    2 – Sannan ya bushe su, don ya rage ƙurar da take kansu

    3 – Sannan sai ya shafi fuskarsa da hannayensa sau ɗaya

    4 – Sannan sai ya shafi bayan tafin hannunsa, ya shafi bayan tafin hannun dama da cikin hannun hagu, sannan bayan hagu, da cikin hannun dama.

    Dalilin wannan siffar ta taimama shi ne, hadisin Ammar Allah ya ƙara yarda da shi ya ce; “Manzon Allah (صلى الله عليه وسلم) ya doki ƙasa da tafin hannayensa biyu, ya busa a cikinsu; sannan ya shafi fuskarsa da hannayensa da su” [Bukhari Da Muslim ne suka rawaito shi].

    Ga bidiyon yadda ake taimama domin ƙara fahimta sosai:

    Domin ƙarin bayani a kan duk wani abin da ya shafi taimama danna nan

    Domin ƙarin bayani a kan Sallar Alwala Da Falalarta danna nan

  • Mene Ne Hukuncin Yi Wa Mace Kaciya?

    Mene Ne Hukuncin Yi Wa Mace Kaciya?

    Kaciyar mata a Musulunce ba ta da wani hukunci na a yi, ko kar a yi cikin shari’ar Musulunci.

    Saboda duk hadisan dake cikin littattafai kamar su: Sunan na Turmuzi da ragowar littattafai, ba su yi magana kan wajibi ne yin kaciyar ko sunna ba. sun yi bayanin al’ada ce na masu yi a waɗancan lokutan baya, tsari na kiwon lafiya kuma, ya nuna hakan na yin lahani ga ‘ya mace, tunda haka ne kuma, Musulunci na karewa duk wani Musulmi abubuwa guda biyar (5) ciki harda lafiyarsa, “ka ga kuwa bai halatta a yi ba, matsawar akwai cutuwa a ciki”.

    Sassa bakwai (7) na jikin ɗan Adam, diyarsu daidai take da diyar rai, domin su ne suke tafiyar da rai da Allah ya busa maka. Sassan su ne kamar haka:

    1. Ido
    2. Kunne
    3. Hanci
    4. Harshe
    5. Wuya
    6. Baya
    7. Al’aura.
    A likitance kuma:
    Yi wa yarinya mace kaciya kamar rage mata daraja ne, kuma ba wani amfanin yi ma mace kaciya. Kuma yin haka yana sa a hukunta duk wanda ya yi ma ‘yarsa mace kaciya.