Yadda Ake Soyayyiyar Gyaɗa Mai Gishiri

Barkan mu da sake kasancewa a cikin shirinmu na GIRKE-GIRKEN WikiHausa, wanda muke koyar da ƙayatattun abinci namu na gida Nijeriya da kuma na ƙetare, tare da bayani a kan lafiyarsu cikin harshen Hausa a sauƙaƙe. Tare da ni Hafsat Shettimah.

A yau za mu koyar da yadda ake yin soyayyiyar gyaɗa mai gishiri. Ku biyo ni a sannu domin mu koya tare.

Ko kun san soyayyiyar gyaɗa na saurin narkewa a jikin ɗan Adam.

Abubuwan Da Ake Buƙata:

1. Gyaɗa rabin mudu (ɓararriyar gyaɗa/mara ɓawo).
2. Ƙasa (kamar kofi biyu). Yashi ko toka.
3. Gishiri chokali uku

 Yadda Ake Haɗawa.

1. A tsince gyaɗa mara kyau, ko a bakace gyaɗar, domin fitar da marasa kyau. Sannan a wanke gyaɗar ta fita fes.
2. A cikin roba mai zurfi a zuba ruwa, ɗan gishiri da kuma gyaɗar, sai a bar ta kamar na awa 3-4 bayan awannin, sai a tace a busar da shi a inuwa ko rana.
3. A zuba ƙasa a cikin tukunya mai zurfi idan ƙasar ta yi zafi sai a zuba gyaɗar cikin ƙasar a yi ta juyawa, har sai gyaɗar ta gasu da kyau.
4. Sai a sauke a raba gyaɗar da ƙasa, sannan a bar ta ta sha iska.

Domin sanin Yadda Ake Soyayyiyar Taliya danna koren rubutun nan.