A yau za mu koyi yadda ake miyar zogale.
Zogale na ɗauke ne da sinadaran dake maganin cututtuka fiye da 100, kamar maganin ciwon gyambon ciki, (Ulcer), maganin hawan jini da ƙara wa mutum kuzari da dai abubuwa da dama.
Za a iya cin wannan miyar da tuwon shinkafa ko na dawa ko masara da kuma na alkama.
Abubuwan Da Ake Buƙata:
- Busasshen zogale
- Attaruhu
- Nikakkiyar gyaɗa
- Tumatir
- Albasa
- Wake
- Magi
- Garin tafarnuwa
- Manja
- Nama ko kifi (Idan da hali)
Yadda Ake Haɗawa
- Da farko dai za a yanka albasa, sannan a jajjaga tumatir da attaruhu
- A dafa wake ya nuna sosai, sannan a ajiye a gefe. A silala nama da gishiri da albasa.
- Bayan haka, sai a ɗora tukunya a wuta sannan a zuba manja, kuma a soya albasa ta ɗan fara soyuwa.
- Sannan a zuba wannan jajjagen kayan miyar. A yi ta soyawa har sai ya soyu kamar yadda ake yi wa miyar dage-dage.
- Sannan a ɗauko wannan romon silalen nama da naman a zuba. Sai a ɗauko magi da garin tafarnuwa da kuma kori a zuba.
- Sai a rufe tukunyar, bayan ta tafasa sannan a zuba wannan waken a ciki a gauraya, har sai ya gaurayu.
- Sannan a ɗauko niƙaƙƙiyar gyaɗar nan a zuba ruwa a gauraya ya koma kamar za a yi kunu, sannan sai a zuba a gauraya. Bayan gyaɗar ta nuna, sai a ɗauko busasshen zogale ko ɗanyen zogale a zuba a gauraya sannan a rufe.
- Haka za a yi har sai zogalen ya nuna sannan a kwashe.”
Domin sanin Yadda Ake Gas Meat danna nan.
