Yadda Ake Hada lemun gyada, shinkafa da dankalin hausa (Groundnut, Rice, Sweet potato Shake)

Barkanmu da sake kasancewa acikin shirinmu na GIRKE GIRKEN WikiHausa wanda muke koyarda ƙayatattun abinci namu na gida Najeriya da kuma na ƙetare, tareda bayani akan lafiyarsu cikin harshen hausa a saukake tare dani Hafsat Shettimah. A yau zamu koyar da yadda ake yin lemun gyada, shinkafa da dankalin hausa (groundnut, rice, sweet potato shake) ku biyoni a sannu domin mu koya tare……

Ko kun san:- Gyaɗa na da sinadarin minerals kamar su copper, manganese, potassium, calcium, iron, magnesium, zinc da kuma selenium wanda suke ƙara ƙarfin ƙashi da haƙori.

Abubuwan Buƙata

1. Shinkafa ½ rabin kofi

2. Gyaɗa ½ rabin kofi

3. Dankalin hausa

4. Gyaɗa soyayyiya

5. Siga

6. Madara

Yadda ake haɗawa       

1. A wanke shinkafa a jiƙata sai tayi laushi

2. A fere dankalin hausa a yayyanka

3. A soya gyaɗa a busar da ita

4. Sai a hade gyaɗa, dankali da kuma jikakkiyar shinkafa a markada a tace da abun tata

5. A raba ruwan gyaɗa biyu da a ɗora a wuta har sai yayi kauri (kamar kunun gyaɗa). Sai a sauke a hade da ragowar ruwan gyaɗar a saka madara da siga. Za’a iya ƙara ruwa dai dai ƙaurin da ake so.

6. Za’a iya tace shi da rariya idan yayi gudaje saisaka a fridge yayi sanyi.

7. Asha lafiya