Kwaikwayon Manzon Allah (S.A.W) A dukkan fuskokin rayuwa. Kasancewar Manzon Allah (S.A.W) shi ne mafi cikar mutane wajen kamala da tsoron Allah Maɗaukaki, kuma ya fi kowa sanin lokaci da yadda za a ribace shi.
Sai rayuwarsa ta zamo cike da abubuwa masu amfani, kuma masu kusata mutum ya zuwa Ubangiji Maɗaukaki. Babu wani motsi ko minti a rayuwar Manzon Allah (S.A.W) wanda bai yi wa dabaibayi da ayyuka nagari ba.
Tun daga wayewar gari har zuwa kwanciya, akwai nau’o’in zikiri da nafiloli da ayyuka nagari da yake yi. Cin abincinsa, sanya tufafinsa, ƙailulansa da barcinsa duk ibada ne, domin yanayinsu bisa yadda Ubangiji Maɗaukaki yake so a yi. Zikirin safiya da maraice duka ɓangare ne na rayuwar Manzon Allah (S.A.W). Mai ƙoƙarin bin koyawar Annabi (S.A.W) da ɗabbaƙa su cikin awoyi 24hr a kowace rana babu shakka, zai fi kowa ribatar lokacinsa.
“Tirmizi ya ruwaito Hadisi daga Abdullahi bn Umar cewa: Akan ƙidaya (istigfarin Annabi (S.A.W) a zamansa guda (tsakanin sahabbansa) kafin ya tashi sama da sau 100 yana cewa:
“YA Ubangiji ka gafafrta min, ka karɓi tubana, domin kai ne mai yawan karɓar tuba kuma yawan gafara”.
Duk motsin da Annabi (S.A.W) zai yi, akwai nau’in zikirin da yake yi idan ya farka daga barci, ko zai sanya tufafi ko zai fita daga gida ko zai shiga.
A halin tafiya, yayin hawa ko gangara. In ya sha. Idan iska ta taso, ko ruwa ya sauka ko an yi tsawa ko sabon wata ya kama. A yayin da wasu al’amura suka wuyata ko kuma yayin haɗuwa da abokan gaba ko magabta. Da zikirin shiga kasuwa ko hawa ko sauka a wani gari.
Don neman ƙarin haske game da irin addu’o’i da zikiran Annabi (S.A.W) cikin awoyinsa 24hr, sai a nemi littafin Hisnil Muslim ko a duba Zadul Ma’ad na Ibnul Ƙayyim ko kuma Alkali Muddayyib na Shehul Islam ibn Taimiya.
Game da sauran ayyukan ibada kuwa, Manzon Allah (S.A.W) ya ce wanda ya yi sallah raka’a goma sha biyu ta nafila, to za a gina masa gida a Aljannah da su. Kuma ya yi wa Abu Huraira wasiya da kada ya bar azumtar kwanaki uku na kowanne wata, da yin sallar walaha da kuma wuturi.
Wanda duk ya bar kwaikwayon rayuwar Annabi (S.A.W) ya saki reshe ya kama ganye. Domin rayuwarsa ba za ta cika da ayyukan ba.
