WikiHausa

Category: WikiHausa

Yadda ake amfani da WikiHausa

  • Waƙar Ya’yan Alhazai

    Waƙar Ya’yan Alhazai

    Ya’yan Alhazai laƙabi ne na Hausawa da Fulani da Bare-Bari (‘Yan Asalin Najeriya) waɗanda aka haife su a ƙasar Sudan, sakamakon tafiya aikin Hajji da iyayensu suka yi.

    1. Ganin ku ‘ya’yan Alhazai ya sa ina; 
    2. Ta tunatunin manya mazajen gaskiya. 
    3. Waɗanda ƙaunar Rabbana tsantsa ta sa; 

    Suka ƙaurace wa gida da daɗin duniya. 

    1. Ba kasuwanci koko noma za su je; 

    Ba bare a ce wannan bahaushe zai iya. 

    1. A a nufinsu kawai su keta duhun dare;  Su fice saharar nan kamar tatsuniya.
    1. Su je “Hijazu”4 Gabas su yo aiki Hajji;  Sannan su ga masu da sun ci burin duniya.
    1. Tun ma Bature bai yi ko da keke ba; 

    Balle su jirgi masu keta samaniya. 

    1. Sai dai su hau doki gami da su taguwa; 

    Koko su Alfadari da Jaki sha-wuya. 

    1. Ko Raƙumi ko ma su wanke ƙafafuwa; 

    Da ƙafarsu za su fito su doshi Sa’udiya! 

    1. Gaishe ku! Bayin Rabbana yaya kukai; 

    Da zama a zango inda babu gida ɗaya? 

    1. “Allahu Akbar” ya kuke a cikin Hama5; 

    Da lokacin rana kamar garwashiya. 

    1. Fatar jikunku kamar gasa ta ake ta yi; 

    Ina kukan samo ruwan sanyi niya. 

    1. Yaya kukai da harin ɓarayi masu son; 

    Su kashe mutum su fice da ɗimbin dukiya 

    1. Ko ko harin kura da kan yi cikin dare;

    4 Hijaz-Qasar Makkah da Kewaye. 

    5 Hamada – Sahara ke nan.

    Ku ko kuna tsaye tun daren har safiya. 

    1. Wata ma a sannan naƙuda kan zo mata: 

    Mata su je mata har ta haife lafiya. 

    1. Fallomi ga su Junaina har da Lubayya ma; 

    Dukkansu su shaida da kun yi gwagwarmaya. 

    1. Khartuumu Undurmana ga Madaninmu can; 

    Maƙil da ‘ya’yayen fataken gaskiya. 

    1. Maiwurno ga Sinari Sinja akwai su can; 

    A garin Damazin har zuwa ga “Isofiya” 

    1. A garin Gadarifu har zuwa Kasala da Bor; 

    Sudan Sawakin duk suna can bai ɗaya. 

    1. Haka nan kukai artabu ɗulin shekaru; 

    Kafin a ce kun je ku bakin Maliya. 

    1. Kogin da babu kamarsa ya haɗe duniya; 

    Zurfi da faɗi ga yawan ambaliya. 

    1. Sannan ku ajjari6 Murkaba wato kwami; 

    Don keta hamshaƙin ruwan nan Maliya. 

    1. Kukan yi kwanakki ɗari a cikin ruwa; 

    Wa ke batun girkin tuwo balle miya! 

    1. Amma a sannan kun yi fama, ba ta ma; 

    Kogi ake ba kawai, abokan taffiya. 

    1. Wani ba jimawa sai amai domin jiri; 

    Kullum yake yi har da tashin zuciya. 

    1. Wani ko gudawa in ta rafkake shi sai; 

    Dai ai ta biƙi nai da kiwon lafiya. 

    1. Shi ko matuƙin ba ruwansa gama mafi; 

    Yawan su ba su da tausayi ko da ɗaya. 

    1. Cewa yake yi ba ruwana ni idan; 

    Wani ya mace lallai a jefa Maliya. 

    1. Haka nan kukai har sai da kun ka haye ruwa; 

    Kuka je ku bautar Rabbana Sarki Ɗaya. 

    1. Haka nan kukai gumu a faɗin rayuwa;
    2. Gaishe ku jikoki da ‘ya’yan alhazai; 

    Ku kanku aya ce ta aikin gaskiya.

    Domin karanta cikekken littafin Danna nan 
  • Musanye Mafi Alheri

    Musanye Mafi Alheri

    Ba za a ce an hana yin amfani da kayan shafe-shafe da sutura na zamani ba gaba ɗaya, sai dai, lallai ne a lura da ladubban Musulunci cikin kowane irin kayan ƙawa da ake so. 

    Bayan haka, kuma matuƙar dai mace kyawun jikinta take tattali, to babu shakka za ta iya samun kayan abinci da na marmari waɗanda ake samun su a gonaki da kasuwanninmu a koda yaushe (cikin yardar Allah).

    Sabobda haka, idan mace ta kula da cin abinci mai gina jiki, kamar nama da kifi da madara da kayan marmari irinsu ayaba da lemon zaƙi da tuffa da kankana da dai sauransu, da kuma kayan ganye, kamar su: lamsir da yaɗiya da zogale da dinkin, duk waɗannan cima ce wadda idan ana cin su akai-a-kai bisa tsari za su sanya jikinta ya yi kyau, kuma fatarta tabyi laushi da haske. 

    Domin karanta bayani akan Muhimmancin Ado Da Kwalliya A Musulunci Danna nan

    Haka kuma sauran kayan kwalliya waɗanda tuni shari’a ta kwaɗaitar da mata a kansu, kamar lalle da kayan zinariya da tadin alharini da sauransu. 

    Bugu da ƙari, motsa jiki akai-akai idan mace za ta iya kullum ta keɓe guri ɗaya, inda ba mai ganin ta, sai waɓda ya halatta (kamar mijinta) ta yi tsalle-tsalle da sassarfa kamar na minti ashirin har ta yi gumi, sannan ta je ta yi wanka, wannan ma zai sanya ta ta zama mai ƙuruciya. 

    Wani muhimmin lamari shi ne, tsoron Allah da yawan ambaton sa da bauta masa cikin nutsuwa, yana sanya haske da annuri a zuciya da fuskar muminai.

    Domin karanta bayani akan Dunƙulallun Matsalli A Musulunci Danna nan 

    Kuma duk irin kwalliyar da mace za ta yi, lallai ne ta lura da ladubban Musulunci na kwalliyar mata, kaɗan daga wannan ladubba su ne kamar haka: 

    (1) Sutura ko kayan kwalliya su zama na halal ne, kuma masu tsarki. 

    (ii) Su kasance masu suturce jikin mace ba masu bayyana kowane sashe na tsiraicin ta ba. 

    (iii) Ya zamana tana yin wannan ado ne don bayyana godiya ga Allah wanda ya hore mata ni’imarsa. 

    (iv) Ya kasance tana ɓoye adonta ga barin maza waɗanda bai halatta su ga adon nata ba. 

    (v) (Idan matar aure ce) ta mayar da hankali wajen kwangwajewa don ɗaukar hankalin mai gidanta. 

    (vi) Kada su zama kaya waɗanda suka keɓanta da maza. 

    (vii) Kada su zama sanandin canza wani abu daga halittar da Allah ya yi mata. 

    (viii) kar su zama kayan ado ne na din-din-din, wato ba za a iya cire su ko goge su daga jikin mace ba. 

    (ix) Kada su hana sadar da ruwa ya zuwa fatar mace. 

    (x)Kar ya zama akwai ɓarnar dukiya a ciki. 

    (xii) Kada su sanya mace girman kai da nuna isa.

    Domin karanta cikekken littafin Danna nan 
  • TSUMAGIYA

    TSUMAGIYA

    1. A ci a cinye, abin da aka samu ya fi a sabunta kayan sana’a. 
    2. A wanke jiki a wanke kaya fes, amma fa gaban gida da layukan unguwa cike fal da tsibi-tsibin shara. 
    3. Abin mamaki. Daga zato sai ka yanke hukunci. 
    4. Aibata wanda ba sa so; da ɓata shi duk nagartarsa. 
    5. Ashe dama maza suna iya cakuɗa da mata, idan kallon hawan sarki ne ya haɗa su? 
    6. Assha maza da gulma, mata da tsegumi. 
    7. Ba da ni ba, yiwa mai kuskure uzuri. 
    8. Ba ku san mu ba ne, mu ne ‘yan-ina-da-laifi mu yayata. 9. Babu ruwana da ƙaramar sana’a; tun da idan na yi ‘yar murya, zan samu na kashewa. 10. Babu wani ɗa banda ɗana. 
    9. Bakin rai,bakin fama, sai mun ga bayan masu son a kawo gyara. 12. Barin ‘ya’ya sasakai suna gararanba a gari. 
    10. Barin abin da aka ci aka rage, ya lalace, ya fi aba wa mabuƙacin da zai mora. 
    11. Buƙatuna suna da yawa; me zan yi da ƙaramar sana’a. 15. Da biyan kuɗin makarantar ‘ya’ya, gara bayar da kuɗin sayen atamfar anko. 16. Da na rufa wa kaina asiri; gara na tona.( inji mutumin da ya kasa riƙe sirrinsa). 
    12. Da neman ilmi, gara zama da jahilci. ( kamar yadda aikin wasu daga cikinmu yake nunawa). 
    13. Da sana’a gara maula. 
    14. Da sayan nagari da za a daɗe ana mora, gara sayen mai arha ko da ba zai biya buƙata ba. 
    15. Da wani ya samu shi ya rasa gara kowa ma ya rasa wato (taɓare Kenan). 21. Da yafiya; gara ƙullatar abokin saɓani.
    16. Da yarda da matsayin da ake kai, gara ƙaryar matsayin da za a kere sa’a da shi. 
    17. Da zama a yi karatu, ko kwanciya a huta, gara zaman tsegumi da gulma. 24. Dokar banza, dokar wofi, ma dai tursasa a bi ta, ba dai mu mu bi ta ba, inji jami’in tsaro. 
    18. Faɗa da gaba da wanda ya fito fili ya faɗi gaskiya. 
    19. Fifita alfahari da magabata a kan yin irin abin da suka aikata har ake alfahari da su. 
    20. Gara ‘yan iskan gari su yanki ɗana; da malami ya doke shi. 28. Gara ina gefe da a ce da ni aka kama mai laifi. 
    21. Haba masu damar ƙari; a motsa ai yafi a daskare. Saƙo daga gungun zawarawa da ‘yan mata. 
    22. Haɗamar sana‘o’i da ayyukan yi, ya hana mu abin yi guda ɗaya ƙwaƙƙwara. 31. Idan kana so mu shirya; to ka goyi bayana a kan rashin gaskiya. 32. Ka gan ni nan; siyasa ce sana’ata 
    23. Ka ji da kyau, ba a komai nake bin addini ba. 
    24. Ka tausaya ka jiƙan sa, bayan ya murmure ya bi ta kanka. 35. Karatu ya koma biki a wajenmu. 
    25. Karatun boko ya fi na addini. Don na kasa biyan kwabon islamiyya na biya wa boko dubu. 
    26. Kayan aro, kasanmu na gado. 
    27. Ke yunwa amma dai da yankan ƙauna kike, ki rasa wanda za ki kayar sai malam matsolo. 
    28. Ko kun ƙi, ko kun so, mu za mu ci gaba da mulkarku.( inji honorabul a ranar zaɓen tazarce).
    29. Kowa da fagen da ya ƙware, inji mai rancen kadarar Naira dubu ya karyar da ita a kwabo, don kece raini da bushashar rayuwa. 
    30. Kowa ma ya mutu, in dai ba za a ƙara mana kuɗin alawus ba. 42. Kowa ya yi abin da ya iya, idan ka sato ka kawo min na saya. 43. Ku kai ni, yanzu zan dawo.( inji ɓarawo a hannun ‘yan bijilan). 
    31. Ku ku ci a gwamnati,mu maci a islamiyya da masallaci.( In ji limamin da ya cinye ƙudin kwamitin gyaran islamiyya da masallaci). 
    32. Ku ƙari kururuwarku, an ce da mai neman haram; Allah yana madakata. 46. Kuna ina? Na ɗauke muku yadda za a yi a samu cikin, ku kuma ku tsaya min da ƙudin hayar gida da ragon suna. 
    33. Kushe abin alherin da baƙo ne ya fare shi. 
    34. Kwabon da zan samu, ya fi raina da lafiya ta.( inji mai bara da mai sana’a tsakanin motoci). 
    35. Mafarkinmu a kullum gwamnati za ta bi mu gida-gida tana raba mana ƙwaryar zuma da nono. 
    36. Mai abin ba shi, shi ne mutum, mara abin ba shi, kuma banza ta fi shi. 51. Mai sata ya yi satarsa; in dai a ranar hawan sarki ne. 
    37. Matsalar wani ce abar tattaunawa, ba tamu matsalar ba. 53. Me ka taka ne? da ka dage sai ka taɓa haƙƙin waninka, ka zalunce shi. 54. Mu iyayen ‘ya’ya, irin wasan da ‘ya’yanmu suke yi ne ya fi dacewa da mu.( inji magidanci a ranar bikin hawan kara). 
    38. Mu muna da inda za mu tare; tun da namu ya samu. 
    39. Mun ƙi mu daina ɗaukar doka a hannunmu, tun da in mun danƙa shi a hannunku, sakin sa za kuke yi. 
    40. Na ga wajen zuwa, inji wanda aka yiwa kyauta ko sadaka. 58. Na sani ku tambayi matata, an ce da ɗan boko, me yake faruwa a gidanka?. 59. Na wani banza namu dukiya. 
    41. Ni kake cewa ci-ma-zaune; don na ƙi sana’a?
    42. Ƙanƙanta laifin da yake yi komai girmansa, da kambama laifin waninsa duk ƙanƙartarsa. 
    43. Karfin halin ba wa mai laifi kariya da ganin bakin mai hukunta shi. 63. Ƙarfin halin tattago aure, ana tsaka da ƙaƙa-ni-kayin samo abin da na gida za su ci. 
    44. Ƙarya da yaudara ce takenmu. (inji ɗan takara a ranar kamfen). 65. Ƙwarewa ce ta sa haka, ni ba na duba mara lafiya, sai yana halin gargara, wato (jawabin likita ga mara lafiyar da ya kai kansa asibiti). 66. Ƙwarewarmu da sanin makamar aiki ce ta sa ba ma ba wa mai neman aiki (offer), har sai ya sakar mana albashinsa na wata biyu. 67. Ran talakanmu ba komai ba ne; hawan sarki ya sa an kashe mutum. 68. Ribibin sana’ar da take ci har sai ta durƙushe. 
    45. Sabon yayi; yin ƙarya a tsakanin ‘ya’ya. 
    46. Samunsa shi ne samu, samun wani ba samu ba ne. 
    47. Sangarta ‘ya’ya da dasa musu aƙidar aiki da aike da wanki da kuma shara; aikin almajiri ne. 
    48. Shi kaɗai aka tsana. (inji uwar da aka yi wa ɗanta faɗan ya yi ba daidai ba). 
    49. Shiri da ni da kai ya ƙare, tun da ka soma irin sana’ata. 
    50. Sokon banza, lusarin kawai, inji matar wanda ba ya tsari da wanda maza suke dabdala a gidansa. 
    51. Tsine wa shugaba duk kirkinsa, idan bai biya musu buƙatar kansu ba. 76. Ya raina ƙadan; ga shi kuma babu hanyar samun mai yawa. 77. Ya yarda da babunsa, amma bai yarda da babun wanda ya saba ba shi ba. 78. Yabon wanda suke so da wanke shi tas, duk rashin kirkinsa. 79. Yara ke neman ilmi ba manya ba. 
    52. Yekuwa jama’a! Takenmu shi ne, rashin shiri da ‘yan uwa da maƙwabta.
    53. Yin gayya a kan abin tsiya; ya fi yin gayya a kan abin kirki. 82. Yin halin ko-in-kula da jaririyar ɓarna har sai ta girma ta ƙazanta a yi ta salallami da tafa-tafa. 
      Domin karanta cikekken littafin Danna nan 
  • Ko Ka San Cewa Idanun Sauro Sun Fi 100?

    Ko Ka San Cewa Idanun Sauro Sun Fi 100?

    Allah (Subhanahu wata’ala) yace:

    ( إِنَّ اللَّهَ لَا يَسْتَحْيِي أَن يَضْرِبَ مَثَلًا مَّا بَعُوضَةً فَمَا فَوْقَهَا ۚ فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِن رَّبِّهِمْ ۖ وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَٰذَا مَثَلًا ۘ يُضِلُّ بِهِ كَثِيرًا وَيَهْدِي بِهِ كَثِيرًا ۚ وَمَا يُضِلُّ بِهِ إِلَّا الْفَاسِقِينَ )

    البقرة (26) Al-Baqara

    Lallai ne, Allah ba Ya jin kunyar Ya bayyana wani misãli, kowane iri ne, sauro da abin da yake bisa gare shi. To, amma waɗanda suka yi ĩmãni, sai su san cewa lallai shi ne gaskiya daga Ubangijin su, kuma amma waɗanda suka kãfirta, sai su ce: “Mẽne ne Allah Ya yi nufi da wannan ya zama misãli?” na ɓatar da wasu mãsu yawa da shi, kuma Yana shiryar da wasu mãsu yawa da shi, kuma bã Ya ɓatarwa da shi fãce fasiƙai.

    A cikin Tafsirin Ibn Khathir As-Suddi ya karɓo daga Ibn Abbas, Ibn Mas’ud da wasu daga cikin Sahabbai cewar: Da Allah ya buga misalai guda 2 na munafukai” ( مَثَلُهُمْ كَمَثَلِ الَّذِي اسْتَوْقَدَ نَارًا )  البقرة (17) Al-Baqara

    Misãlinsu shĩ ne kamar misãlin wanda ya hũra wuta, Da kuma: ( أَوْ كَصَيِّبٍ مِّنَ السَّمَاءِ ) البقرة (19)  Al-Baqara

    Ko kuwa kamar girgije mai zuba daga sama, Sai Munafukai suka ce: Allah ya fi ƙarfin ya buga misalai da waɗannan abubuwan Sai Allah (Subhanahu wata’ala) ya saukar da ita waccan ayar har zuwa:  أُولَٰئِكَ هُمُ الْخَاسِرُونَ ) البقرة (27) Al-Baqara waɗannan sũ ne mãsu hasãra.

    Sa’id yace: Ƙatada yace: “Allah ba ya jin kunyar faɗin gaskiya idan ya buga misali akan abu: babba ne ko ƙarami. Lokacin da Allah (Subhanahu wata’ala) ya buga misali da ƙwaro da gizo-gizo a littafin Sa, sai Munafukai suka ce: Me yasa Allah ya yi misali da waɗannan abubuwan. Sai Allaah ya saukar da:

    ( إِنَّ اللَّهَ لَا يَسْتَحْيِي أَن يَضْرِبَ مَثَلًا مَّا بَعُوضَةً فَمَا فَوْقَهَا ۚ  البقرة (26) Al-Baqara

    Lallai ne, Allah bã Ya jin kunyar Ya bayyana wani misãli, kõwane iri ne, sauro da abin da yake bisa gare shi. 

    Abu Jafar Ar-Razi ya karɓo daga Ar-Rabi bin Anas wanda ya yi sharhin wannan Ayar (2:26): “Wannan ne misalin da Allah ya bayar dangane da rayuwar wannan duniyar tamu”

    “Sauro yana rayuwa ne indai har zai ci abinci amman yayin da cikinsa ya cika sai ya mutu. Wannan shi ne misalin wasu mutanen waɗanda Allah ya faɗa a cikin Qur’ani:

    ( فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّىٰ إِذَا فَرِحُوا بِمَا أُوتُوا أَخَذْنَاهُم بَغْتَةً فَإِذَا هُم مُّبْلِسُونَ )

    الأنعام (44) Al-An’aam

    Sa’an nan kuma a lõkacin da suka manta da abin da aka tunãtar da su da shi, sai Muka bũɗe, a kansu, ƙõfõfin dukkan kõmai, har a lõkacin da suka yi farin ciki da abin da aka ba su, Muka kãmã su, kwatsam, sai gã su sun yi tsuru-tsuru.

    A cikin waccan aya ta 26 (Da Allah ya yi misali da Sauro): فَمَا فَوْقَهَا ۚ (…da abin da yake bisa gare shi.) Wanda yana daga cikin halittun da ake ɗaukarsu da ƙasƙanci kuma mafi ƙanƙanta. Muslim ya rawaito Hadisin Aisha (Radiyallahu anha) tace: Annabi (Sallallahu alaihi wasallam) yace: «مَا مِنْ مُسْلِمٍ يُشَاكُ شَوكَةً فَمَا فَوْقَهَا إِلَّا كُتِبَتْ لَهُ بِهَا دَرَجَةٌ، وَمُحِيَتْ عَنْهُ بِهَا خَطِيئَة»

    “Babu musulmin da zai cutu silar taka ƙaya (فَمَا فَوْقَهَا) ko abinda ya fi ta girma, face Allah yasa an rubuta masa lada cikakke sannan a kankare masa zunubinsa” (Sahih Muslim)

    Don haka Allah ya sanar da mu cewar babu wani abu ƙarami ko babba da ba za a iya misali da shi ba ko da kuwa ƙanƙantar sa ta kai Sauro ko gizo-gizo. Tun da har Allah (Subhanahu wata’ala) ya buga misali da sauro a cikin littafi Mai Tsarki, to tabbas sauro yana da abubuwan Al’ajabai. Ku gyara zama domin ilimantuwa da su.

    Sauro ! Tun muna yara muke ji da ganin illar wannan ƙaramar halitta ga lafiyarmu. To amma ya kamata mu ƙara zurfafa tunani akan wannan halitta mai ban mamaki. Yayin da ɗan Adam yake da idanu guda 2 domin gani, shin ko ka san da cewar sauro yana da idanu sama da guda 100 masu suna mini eyes kuma kowanne guda 1 a cikinsa shi ma akwai sama da guda 100 da ake kira da lenses, kuma kowanne da irin aikinsa.

    Dalilin hakan ne yasa ba za ka iya kashe shi farat ɗaya ba ko da kuwan ka biyo ta bayansa. Irin wannan dalilin ne yasa aka kwaikwayi idon sauron ta hanyar ƙirƙiro CCTV camera, drones, motoci masu tuƙa kansu da kansu da ake kira da “self driving cars”, da dai sauransu. Allahu Akbar !

    Shin ko kun san da cewar macen sauro ce take cijo ba wai namijin ba ?

    Shi aikin namijin shi ne: ya sadaukar da rayuwarsa ta hanyar jan hankalin mutum domin macen (wato matarsa) ta samu damar zuƙar jinin da za ta samar da isassun ƙwayayen da za ta ƙyanƙyashe ta yanda za a ƙara samun wasu ‘ya’yan sauron, kenan hakan yana nufin ta cikin jininmu suke samun ƙwayayensu, wanda a ƙalla macen sauro tana ƙyanƙyashe ƙwayaye guda 100 zuwa 200 a lokaci ɗaya, Allahu Akbar !

    Allah mai yanda ya so !

    Yayin da ya zamana Allah ya haliccemu da zuciya guda 1, shin ko kun san da cewar sauro yana da zuciya har guda 3 ?

    Akwai left ventricle  akwai right ventricle sannan kuma akwai central ventricle kuma cikin ikon Allah, kowacce da irin aikin da take yi a jikin sauron. Sauro ita ce halittar da ta fi kowacce halitta yawan kashe ɗan Adam ta hanyar saka masa cutar Malaria, Zika da kuma West Nile. A ƙalla da akwai ire-iren sauraye a duniya sama da 3,500 waɗanda suke satar jinin dabbobi kama daga micizai, kifaye da kuma mutane domin su samar da ƙwayayensu.

    Sauro na iya ganin mutum a cikin mosquito net ba tare da wani shamaki na bango ba, a maimakon mu da muke amfani da haske domin gani, shi kuma sauro yana amfani da iskar Carbon dioxide ne wadda yakan iya shaƙar numfashinka daga nisan ƙafa 150, hakan ke ba su damar gano blood group ɗinka, wanda indai bai yi dai-dai da nasu ba, ba za su sha jinin ba, Allahu Akbar !

    Allaah cikin iliminSa ya bawa Professor Jeffery Riffel (Malamin Biology a Jami’ar Washington ta Amurka) ikon gano dabi’un sauro dakuma yanda sauron yake tunani. Lokacinda ya bude qoqon kan sauron wanda ake kirada cuticle yaga qwaqwalwar sauron, kamar yanda ya zanatawa manema labarai. Sun gano hakanne bayan shafe shekaru samada 12 shi da abokan aikinsa (team)

    Shin ko kun san sauro yana kaɗa fika-fikansa sau 1000 a cikin second 1 ?

    Yayin da macen sauro take sokawa fatar mutum allurai 6 da suke a bakinta, a lokacin ne namijin sauro yake jan hankalin mutum don aikin macen ya kammala ba tare da mutum ya farga ba.

    Duk da cewar ma kafin ka ji zafin cizon sai an ɗauki ‘yan sakwanni saboda allurar sedative da take tsirawa fata domin kashe zafin cizon, yayin da aikin ya kammala ita kuma ta riga ta bar fatar a lokacin ne zafin cizon zai fara tasiri akan fatar mutum, yayin da ka kai duka kuma tuni ta daɗe da tsotsar adadin jinin da take buƙata. Allahu Akbar !

    Wannan duk ba abin mamaki ba ne domin kuwa idan muka koma cikin littafin Allah, Al-Qur’ani mai girma to za mu tabbatar da cewar ikon Allah ya wuce duk yanda ‘yar ƙaramar ƙwaƙwalwarmu take tunani. Tuni Allah ya faɗa a cikin Suratul Baqara aya ta 26. To a nan tunda ka ji misalin sauro ya fito a cikin Qurani kai ka san yana da abubuwan al’ajabi kam.

    Wannan kaɗan daga cikin bayani ne akan halittar sauro, daya daga cikin ziliyoyin halittun Allah, duk Allah ya ba wa masu ilimin kimiyya wannan damar ne domin su gane ayoyinsa da suke sararin sama’uddunya da kuma kan duniyarmu ta Ard da muke rayuwa.

    Domin karanta cikakken littafin danna nan

    Edita; Rumasa’u Muhammad Kallamu

     

     

     

     

     

  • Yadda Ake Faten Tsaki Da Wake

    Yadda Ake Faten Tsaki Da Wake

    Fate abincin gargajiya ne wanda ya samo asali tun iyaye da kakanni. Yana ƙunshe da ganyayyaki masu ƙunshe da sinadarai waɗanda ke inganta lafiyar jiki.

    Abubuwan da ake buƙata idan za a yi wannan fate su ne:

    • Wake
    • Tsaki
    • Kayan miya
    • Mai
    • Alayyahu
    • Yakuwa
    • Kabewa
    • Gyaɗar miya
    • Sinadarin ɗanɗano
    • Gishiri da kuma 
    • Tantaƙwashi

    Da farko za ki dafa wake ya dahu ya yi luguf, sai ki ajiye shi a gefe. Sai ki zuba tantaƙwashi a tukunya ki ɗora a kan wuta, sannan ki zuba gishiri da sinadarin ɗanɗano da kayan ƙamshi a ciki. Ki bar shi ya dahu na tsawon minti goma zuwa sha biyar. Daga nan sai ki zuba kabewa da kayan miya a ciki, sai kuma ki ƙara ruwa madaidaici.

    Bayan ya tafasa na tsawon minti goma sai ki kawo tsakin nan (wankakken tsaki) ki zuba, sai ki zuba sinadarin ɗanɗano da gishiri daidai gwargwado. Bayan kamar minti shida zuwa bakwai, sai ki ɗakko dafaffen waken nan ki zuba, ki zuba gyaɗar miya da alayyahu da kuma yakuwa. Sai ki ɗan zuba mai ki jujjuya, sai ki rufe ki rage wuta sosai.

    Bayan kamar minti biyar sai sauke. 

    Domin tuntuɓa ko ƙarin bayani a kira 07030353500

    Ko kuma ka je kai tsaye cikin tasharmu ta Wikihausa 

     Don ganin yadda ake Faten doya da wake danna nan 

  • Yadda Ake Sabulun Wanka Da Wanki

    Yadda Ake Sabulun Wanka Da Wanki

    A yau za mu kawo muku yadda ake yin sabulun wanki da wanka. Sabulun wanki da wanka yana cire dauɗar jiki da na tufafi. Wannan sabulun za ki iya siyar wa ko kuma ki yi amfani da shi a gida, kin ga riba biyu kenan ki siyar sannan kuma ga amfanin gida, kin huta siya tun da ke ma mai haɗawa ce.

    Sannan za ki ga kin samu sauƙin siyan sabulu, tun da kin iya haɗawa kin ga mai gida ya huta siya, kin ga kin rage masa wani nauyin ga kuma tsaftar jikinki da ta tufafi.

    GARGAƊI

    1.  A kiyaye yin sa gaban yara, saboda kwastik soda [costic soda] tana da hatsari sosai, mu kiyaye lafiyar jiki da hannu wajen gujewa haɗarin chemical na kwastik soda.

    2.  A kiyaye zuba kwastik soda[costic soda][ fiye da ƙa’ida, saboda yin hakan babban haɗarari ne ga lafiyar jiki da tufafi.

    3.  A tabbatar da an gane haɗin wannan sabulun, idan ba ka gane ba ka nemi ƙarin bayani a wajenmu.

    4- Ya zama ba bu kuskure wajen siyan kayan.

    SINADARAN DA AKE BUƘATA

    1-Kwastik soda [Costic soda] 1kg

    2- P.K.O oil   6 littres

    3- Ruwa 4kg

    SAI KUMA

    Sikeli [ma’auni]

    Muciya

    YADDA AKE HAƊAWA

    Da farko za ki fara zuba kwastik soda [costic soda] a babban mazubi 1kg, sannan sai ki ɗebo ruwa 4kg, sai ki fara zuba kwastic soda ɗinki a cikin wannan ruwan da ki ka auna, sai ki fara juya shi da muciya a hankali.

    Yayin da ki ke juyawa za ki ga yana hayaƙi sai ki bar shi ya yi kamar minti shida, bayan ya huce sai ki zuba ruwan PKO oil ɗin ki  a ciki kina zubawa kina juyawa har ya haɗe jikinsa.

    Dama kin tanadi tukunyarki mai ɗan faɗi, sai ki sanya ledar sukari a ciki mai faɗi ita ma, sai ki juye wannan haɗin sabulun a ciki. Shikkenan kin gama sabulunki.

    Sai ki bar shi ya bushe zuwa kamar awa uku ko biyu lokacin ya bushe sai ki cire shi a cikin ledar ki yanka shi yadda ki ke so. Idan kuma kina son ya yi miki mai shakali (shape) mai kyau sai ki siyo abin zuba sabulu, wajen ma su siyar da kayan kek (cake).

    Za ki gan shi kamar roba-roba. Yana da shakali na triangle akwai mai circle. Sai ki ga ya fito da shakali mai kyau.

    Shikkenan mun kammala sabulunmu. Sannan idan mutum yana buƙata zai iya sanya kalar da yake so, ko kuma sanya sinadarin ƙamshin da ki ke buƙata domin ya ba da ƙamshi na musamman.

    Domin karanta yadda ake haɗa sabulu na ruwa na wanki ko sabulun wanki ko na wanka, ko yadda ake haɗa man gashi danna nan Ko ku tuntuɓe ni kai tsaye ta wannan lambar 07068606171

    Ko kuma ka je kai tsaye cikin tasharmu ta Youtube domin kallon yadda ake haɗawa cikin sauƙi, mai suna WikiHausa

    Edita; Rumasa’u Muhammad Kallamu

     

     

     

     

     

     

  • Abubuwan Da Suke Ƙara Soyayya Ga Maigida

    Abubuwan Da Suke Ƙara Soyayya Ga Maigida

    Irin waɗannan abubuwa da zan lissafo, suna ƙara danƙon soyayya a tsakanin miji da mata. Kulawa da tarairayar maigida, cikin sigar bege da ƙauna, na bai wa mace babban matsayi ta zamo ta yi wa abokan zamanta fintinkau. Ba tare da ta kashe ko kwabo ba (wato ba boka ba malam).

    Kuma suna sa maigida ya dinga begen matarsa. Ina kira da mu gane fa, ba a wajen Indiyawa ko Turawa ake koyon soyayya ba, su ma mafi yawancin abubuwan a cikin Musulunci suka ɗauka suke yi. Mu kuma musulman ba ma yi sai dai mu dinga sha’awarsu. Ga su kamar haka:

    GYARAN JIKIN MAIGIDA

    Mace za ta dinga kula da askin wasu ɓangarori na jikin maigidanta, tare da gyaran fuska. Kuma za ta dinga wanke wa mijinta ƙafarsa ko da sau biyu ne a sati. Ya danganta da yadda maigidan yake so. Wankin ƙafa ba sabon abu ba ne. Wace ta ke ganin ba ta iya ba, za ta iya zuwa gidan gyaran gashi ta biya a wanke mata don ta koya. Haka ma za ki dinga kula da yankewa maigida farce. Sai dai duk waɗannan abubuwan ba a yin su, sai an yi ta gwaji tukunna. Domin duk mijin da kika yanke shi wajen aski ko gyaran farce, to fa ba zai ƙara yarda ki yi masa abubuwa na gyaran jiki ba. Don haka, sai ki yi ta yi wa ƙannenki akai-akai har ya zamo kin ƙware sosai.

    Domin karanta Yadda ‘Yan Mata Ya Kamata Su Kula Da Jikinsu Daga Lokacin Balaga Danna nan

    Mun samu kyakkyawan abun koyi na gyaran jikin maigida daga uwar muminai, A’isha matar Annabi (S.A.W). A inda ta ce:

    “Annabi (SAW) ya kasance yana zuro kanshi wajena, yana Itikafi, sai na wanke masa shi……….”.

    (Bukhari da Muslim)

    TSARIN ABINCIN MAIGIDA

    Mace za ta dage wajen iya girke-girke. Sannan kuma a duk lokacin da zai ci abinci. Sai a tabbatar an zuba masa daga kwanon abinci (food flask) zuwa faranti (plate). Kuma a tsiyaya masa ruwa ko lemo daga kwalba ko roba (jug) zuwa kofin shan ruwa. Har ila yau kuma, kada a matsa ko’ina in ba da lalura ba. Za a zauna a ci tare ko dai kada a matsa har sai ya kammala cin abincinsa.

    Haka kuma yana da matuƙar muhimmancin gaske, mace ta fidda jadawali (time table) na abincin gidanta. Don gudun kada ta yi ta maimaita abinci iri ɗaya kullum. Amma ke sai ki lura da irin abincin da mijinki ya fi so.

    Domin karanta Waya Kamata In Bayyana Wa Sirrina Idan Na Fara Al’ada Danna nan 

    RAKIYA DA TARBAR MAIGIDA

    A duk lokacin da maigida zai fita, sai a yi masa rakiya har bakin ƙofa. Ana tafe ana yi masa addu’a. Allah ya bada sa’a. Allah ya dawo da kai lafiya. Idan an zo madakata, to sai a yi sallama da jikinsa da bakinsa.

    Haka kuma idan dawowa ya yi, to da an ji sallamarsa sai a yi maza a je a taro shi. Ana murmushi da faɗin sannu da zuwa. A nan ma za a iya maraba da jikinsa da bakinsa.

    Wannan maraba da jiki fa, mai gidan ba zai saki jikinsa ba. Sai ya gan ki fes, kuma kina ƙamshi. Don haka ake son ki dinga shiryawa kafin maigida ya shigo. Don kada maigida ya zo ya ganki a hargitse, shi ya sa ma aka hana shi shigowa gida bagatatan. Kamar yadda ya zo a Sahihul Bukhari.

    “Idan ɗaya daga cikinku ya tsawaita tafiya, kada ya kwankwasa wa

    Iyalinsa ƙofa da daddare”.

    (Bukhari)

    Ashe abu ne mai matuƙar muhimmanci ki dinga lura da irin halin da maigida zai tarar da gidansa da kuma ke kanki. Don Annabi (S.A.W) yakan dawo gida daga tafiya lokacin walha (da hantsi) kuma yakan sanar da iyalansa cewa ga shi nan tafe, tun kafin ya iso gidan.

    Domin Dauko Cikekken Littafin Danna nan 

  • Shin Mutum Na Da Buƙatar Gyara Don Zai Aure

    Shin Mutum Na Da Buƙatar Gyara Don Zai Aure

    Duk da cewar ina mace wannan Rubutun Bai Kamata nayi saba amma abin dana duba yin rubuta zai taimakawa al”umma wanda suke shirin aikata hakan sudaina zai taimakawa AI’umma sosai shiyasa zanyi Allah yasa wasu karsuyimun wata Fassara.

    Zan so naja hankalin mu game da wani muhimmin al’amari dake faruwa na baiwa Samari ko Matasa da aurensu yazo dab shawarar shan maganin karfin Maza kamar yadda a ɗaya hannun iyaye kan ɓata lokaci wajen shirya ƴaƴa mata.

    Zanyi jan hankalin ne ganin yadda abin ya kai ga fara jawoma matasan mu mutuwar tsaye, wanda kuma aqalla na sami cases huɗu kenan cikin wata guda kan matsalar, wanda na tabbatar a sauran asibitocin mu na Nigeria suma suna samun masu matsalar dakan je musu. 

    Masu cikakken hankali tare da nazartar al’amura cikin mu a yau zasu iya gane ko rubutu ne a media inya zamto an sirka yasashshen zance ko Batsa ciki yafi jan hankalin mutane, anfi tururuwa kansa.

    Domin karanta Abubuwan Da Sukan Iya Taimakawa Wajen Raguwar Warin Baki Danna nan 

    Wannan ke nuna irin yadda mutane suke baiwa al’amarin sha’awa muhimmanci a yau. Wanda abin har ya wuce mizanin lafiyayyen hankali.

    A kwanakin da suka gabata mun sami wani mara lafiya da aka kawo asibiti ta emergency da wata matsala da muke cewa “FRIYAFIZIM” Wato miƙewar alƙalami yaƙi kwanciya, komi irin ƙoƙarin ganin ya kwanta ɗin da za ai kuwa bazai ba, kuma in aka matsa ma tsab zai karye. 

    A tsarin aiki na jiki shi namiji gabansa bai miƙewa tsaye cak ya sami erection face sai idan jini yana kwaranyowa yana cika jijiyoyin azzakarinsa. Wanda idan jinin ya cika jijiyoyin taf shine gaban zai miƙe tsaye cir ai abinda za ai, shi kuma wannan jinin yana shiga ne ta jijiyar ATIRI (artery) tare da fita ta cikin jijiyar Ben (Vein) a guje batare da jinkiri ba, continuous circulation.

    Toh amma idan ya zamto jinin ya shiga jijiyar ATIRI amma hanya ta kulle ya kasa yin gaba ko baya zuwa jijiyar Vein balle ya fice to shine azzakari zai kasance tsaye cak, ya ɗau ɗumi, ko me mutum zai abin bazai taɓa kwanciya ba wato friyafizim kenan.

    Wanda shi dama maganin ƙarin karfin maza aikin da yake yi shine buɗe jijiyoyin jinin azzakari su tale, su cika dam da jini don ya zamto ansami erection tare da qarawa zuciya gudu.

    Domin karanta bayani akan Matsala Ta Rashin Karfin Mazakuta Ko Rashin Tashin Gaba Gaba Daya Danna nan

    Babbar damuwar kamar yadda na faɗa a baya ita ce; a yau zaka sami matasa zarar mutum zai aure misali ga maza Zakaga daga cikin abokansa wasu na kokarin bashi shawara tare da son fahimtar dashi cewa lallai fa yana bukatar yasha irin wnn maganin na ƙara kuzari… Saboda da yawa sun jahilci al’amarin jima’i, wasu ma fa cikin masu bada shawarar basu da auren, har ko a riƙa nunawa mutum cewa bazai taɓa mutunci gun Matarsa ba inba wannan…. Subhanallah. 

    A gaskiya wannan muguwar shawara ce, kuma ina ƙalubalantar duk me ɗora mutane kan irin wannan muguwar shawarar da sunan taimako akan ya fito yai baje koli hujjojin da ya dogara dasu, ya dace mutane suji tsoron Allah, koda kudi zamu nema to kada mu zamto masu yi ta hanyar saka rayuwar mutane cikin hatsari, ta yadda kudin kurum muke hange, domin abin na neman zama kamar wani normal alhalin IS NOT Normal medically.

    Domin da magana ta fatar baki kacal kana iya dora mutum kan abinda zai iya halaka wanda in shi bai gane kai ka cucesa ba’ ya ɗauki mataki toh zade ku haɗu a gaban ubangiji. 

    Shi wannan patient ɗin irin tsutsayin da ya haɗu dashi kenan bayan da ya biyewa gurguwar shawarar abokansa, suka samo masa tare da sanya shi shan maganin a daren ranar daurin aurensa, inda karshe ya sami firiyafizm, gabansa ya kasance miƙe yaqi kwanciya tsawon awonni sama da ashirin da biyu, kuma bai tunanin zuwa asibiti ba farko ganin hakan, yaje ya sami wanda suka bashi shawarar akan abinda ke faruwa amma sun rasa taya ma zasu taimaka masa, domin iya abinda suka sani shine in ansha za’a sami mikewar gaba yadda ko anyi release kai tsaye za’ai saɓi zarce… Amma menene matsalar da ka iya biyo baya sam babu wanda yasan komi.

    Domin karanta Hiv/Aids Cutar Kanjamau (Sida) Danna nan

    Karshe kurum nuna masa ya koma ga iyali sukai, irin ai Normal ne sha’awar sa ce bata gama karyewa ba, alhalin duk ya gama yiwa yar mutane rauni, tun ana abu na daɗi ya koma wahala, haka ya zauna tun alƙalamin bai fara zafi ba har ya fara… Wanda saida ya fara fita hayyacinsa, yaji ba sarki sai Allah sannan ya nemi san uwansa aka kawo asibiti a jigace.

    Nan mukai tambayoyin da suka dace don sanin makamar fara aiki, a gaggauce muka fara ƙokarin ganin yadda zamu taimake sa domin a awoyin da ya dauka munsan gaban na iya mutuwa, Tunda gashi ya fara fita daga hayyacinsa saboda azaba.

    Kai tsaye muka zira allurai jiki muka fara kokarin zuqe jinin da ya zamto trapped cikin azzakarin, tare da flushing da ruwa sama da liter 1 da rabi, da sauran allurai, wanda bayan shafe kusan awa guda, muka fara samun nasarar kwantar da ita, saide bayan baifi minti 20 ba da gama wannan wahalar abar ta qara mikewa tsaye wato Recurrent stuttering priapism… A nan ne fa ya zamto bamu da zaɓi sama da musa wuƙar mu ta fiɗa “surgical blades” mu lumata ciki kan kaciyarsa don samun kwaranyowar jini sosai, haka mukai ta fama kafin Allah ya bamu sa’ar kwantar da ita, wajen sama da awa 2 muna aikin abu guda

    In taƙaice muku de dalilin wannan illar da yai ma kansa da tsawon lokacin da ya dauka kafin zuwa ga likita rashin jinin dake circulation yasa tsokokin azzakarin sun lalace, ya gamu da Probable permanent Erectile dysfunction, Wato gabansa bazai kuma tashi ba koda yaji sha’awa ballantana ma sha’awar ita kanta ta taɓu. 

    Abu daya ne ya rage shima sai in yana da gata ko hali shine; ai aiki asa masa penile implant “Wato dashen robobi cikin azzakari”, robobi masu kamar rehu da inyaso jima’i zai riƙa matsatsu kamar irin yadda ake matsa robar jikin abun awon hawan jinin nan “spygmanometer” da ake matsawa yake qara tsamke hannu, inyaso in angama jima’in sai ya kwance kan robar iskar ta fita’ gaban ya kwanta.

    Saide ko shi wannan ɗin yana bukatar kusan Naira Milyan 5 zuwa 10 koda a Nigeria za ai aikin, kuma ba tabbas ma in anyi adace. Sannan ko andace bazade ka taɓa kwatantashi da natural erection ba.

    Wannan shine yadda sauraron kowanne irin taci barkatai din shawarwari kan kai mutum ya barosa. Yanzu amaryar da shi yaso birgewa shin zata iya haƙuri ta rayu dashi ahaka kuwa? Wannan can zasu warware ta, amma da kamar wuya de kam. 

    Don haka kamar yadda nake faɗa muji tsoron Allah, mu sani in wani fa yai rawa an watsa kudi wani inyai duka zai ci. Eh Mun yadda muna iya zamowa mutane baki daya… To amma fa ginin halittar jikin mu na kowa ya bambanta da juna, kamar yadda kakannin mu da kalar surar mu suka bambanta dana juna. 

    Baka bukatar shan komi don kurum zakai Aure! Bai dace mu zamo birkitattu marasa lissafi ba. Ko zinace-zinace ka saba yi kake zaton kana da matsala yana da kyau ka fahimci jima’i da Macen da aure ne tsakaninku yasha bamban da wacce ita kuɗi ne tsakaninku. Ka lura da cin fruits, tsafta, wanka, wanki, shafa turare, iya magana, da kyautata mu’amala shikenan kurum. 

    Duk wata matsala da zaka ga alamun kamar kana da ita a sanda kai sabon aure kurum ka kau da kai ka bata lokaci, ba matsala bace har sai kaga kun shafe watanni 6 cir batare da abin ya kau ba…. sannan ne zaka iya tabbatar da matsala, inba haka ba koda saurin inzali bai amsa cewa akwai sa har sai kai wata 6 kana jima’i batare da jin ka gamsu ba.

    Amma daga lokacin da ya zamto kuna gamsuwa to ko minti 2 kake sunansa jima’i kuma lfy kake, ba sharadi bane duk jima’i sai an shafe tsawon mintoci masu yawa, ba yadda yake a finafinan Batsa ba yake a zahiri. Kuma wannan ina bayani ne akan duk wani maganin karin karfi walau na Hausa kona bature. Bakai bashi, muddin ba’a son a shiga wahala. 

    Kuma in kana tunanin matsala fara zuwa babban asibiti Urology center, Teaching hospital, FMC, ko Specialist hospital tukun kaga likita, bawai garzayawa ga masu magungunan gargajiya ko Islamic Chemist ba, asibiti ne matakin farko basai abu ya lalace ka doso mu ba.

    Karant maganin Matsala Ta Rashin Karfin Mazakuta Ko Rashin Tashin Gaba Gaba Daya

  • Ba Kowane Ciwon Ƙirji Ba Ne Ulcer

    Ba Kowane Ciwon Ƙirji Ba Ne Ulcer

    Mutanen mu sun lamincewa kansu cewa; duk ciwon ƙirji kurum ulcer ce, shi yasa ciwon zuciya ya aika mutane da yawa lahira ta farat ɗaya da sunan ulcer, domin ba a son zuwa asibiti ai gwaje-gwajen da suka dace, asalin uwar hanji ba ma a kirji take ba, sai dai eh mun ji ana iya jin ciwon ƙirji sanadiyyar refer pain amma ba dole ulcer ba ko yaushe. 

    Shi fa gwajin nan ba ka da buƙatar sai likita yace ma ga shi yi kaza. A ah in ka ga bai da niyyar ba ka matuƙar da hali roƙa za kai ka ce kana so ya ba ka gwaji iri kaza kayo don kurum ka ƙara sanin matsayin ka.

    Ciwon ƙirji abin tsoro ne musamman in mutum na da hawan jini, matsalar zuciya, ballantana wasu sun gado matsalar da ba su san suna da ita ba a family, haka wasu suna da matsalolin hawan jini amma ba su sani ba, gani suke ciwo kaza sai a tsoffi ko masu aure, wa ya gaya ma haka? 

    Idan kuna so ku karanta Bayani A kan Gyambon Baki {Canker Sore} Danna nan

    Sai dai ina! Duk maimakon haka kun gwammace zama ku yi ta ɗibar maganin ulcer har sai ya kai ga fara sa ku gudawa, ga shi fa saboda wauta ana jin ana shan maganin amma ba canji, kuma ko da an ji relief zai dawo, amma mutum ya share duwawu ya zauna, ulcer ɗin nan fa ana warke ta. 

    Ya kamata mu sani duniya ta wuce wannan zamanin, in dai ka iya neman kuɗi, toh dole kuma ka koyi neman lafiya tare da tattalin ta, dole ne kai wa rashin lafiya tanadi tun kan ta zo. 

    A yanzu dai ba ka da buƙatar sai ka ji ciwo sannan ka je asibiti, masu dabara duk shekara sukan je sau 1 su nemi a ba su mahimman gwaji da suka dace da masu shekaru irin nasu saboda in ma jikin su ya fara shiga wani lokon to ai ƙoƙarin tsamo shi.

    Domin karanta bayani a kan Samiha-Borin Jini {Hives,Urticaria,Neetle Rash} Danna nan

  • Lalurar  Gaggautowar Saurin  Balaga (Precocious Puberty)

    Lalurar  Gaggautowar Saurin  Balaga (Precocious Puberty)

    Firikoshiyos Fubati: Wani yanayi ne na tangarɗar halitta da ke haddasa gaggawar bayyanar balaga tsakanin ƙananun yara mata kafin su cika shekara 8 a duniya, da kuma ƙananun yara maza tun kafin su kai shekaru 9 da haihuwa.

    Toh sai dai an fi gani kuma a shaida matsalar nan da nan a yara mata duba da halittunsu su ne suke kusan bayyane ƙarara (nono) saɓanin rukunin Maza.

    Waɗannan Suffofin Balagar Da Ake Gani A Yara Mata Su ne:
    • Bayyanar girman nonuwa a kirji
    • Bayyana ƙurajen pimples
    • Bayyanar gashin hammata
    • Bayyanar gashin gaba, da kuma
    • Fara jinin haila

    Duk ana ganinsu ne tun kafin yarinya ta cika shekara 8 a duniya kamar yadda na faɗa. Domin karanta Bayani Mai Mahimmanci Zuwa Ga Mata Akan {Ovulation} Shiga nan

    Yayin Da A Ɓangaren Yara Maza Alamun Da Iyaye Kan Fara Gani Su ne:
    • Girman jakar ƴaƴan maraina yaro (scrotum)
    • Gashin gaba cunkus (Pubic hair)
    • Girman azzakari kamar na babba
    • Gashin hammata dana fuska
    • Karyewar murya zuwa ta manya

    Duk waɗannan na faruwa ne ga yaro tun kafin ya cika shekaru 6 a duniya.

    Me Ke Haddasa Irin Wannan Saurin Balaga

    Hakan na faruwa ne sakamakon tangarɗar aikin wata halitta a ƙwaƙwalwa da ake kira FITUITARI GILAN (pituitary glands) wanda shike kunshe da rassa  kimanin shida.

    Wanda rassan shida kowannensu da abunda yake samarwa, Kama daga samar da sinadaran dake taimakawa wajen jima’i, narkar da abinci, tace jini, girman jiki, ƙwarin ƙashi, daukar ciki, girman nonuwa, tsatstsafowar ruwan nono, fitsari, naƙuda, jinin haila, samuwar maniyyi da sauransu.  

    Toh guda 1 cikin rassa 6 dinne na fituitary sai reshen dake samar da sinadaran haihuwa, sha’awa, jima’i maniyyi, wankin mahaifa da jinin haila ke samun matsalar dake sashi fara sakin duk wadancan sinadarai na (istrojin, furojesteron,) wanda zasu bayyanar da wadancan alamomin cikar halittar mace ko namiji tun kafin lokacin da ya dace su fara bayyana wato tsakanin shekaru 12 zuwa 16 na rayuwa.

    Wannan shine gaggawar balaga, wanda ya bambanta da saurin balaga.

    Shi Kuma Saurin Balaga [Early Puberty]

    Kamar yadda nace a hannu guda kuma baya ga FIRIKOSHUYOS Akwai kuma wata makamanciyar matsalar da akewa laƙabi da Early puberty wato saurin balaga. Shi kuma precocious kamar gaggautowar balaga.

    Anan shi ELI-FUBATI shi ma duk ana ganin wadancan suffofin na bayyanar nonuwa tsir-tsir a kirjin yarinya, koma kila inta matsa kan taga hadda ruwa, fara haila, canzawar warin jiki, pimples da bayyanar gashin jiki ga mace. 

    Haka ma girman ƴayan maraina, karyewar murya, fitar maniyyi, girman azzakari da duhun matse-matsi, gami da canzawar warin jiki ga yaro namiji.

    Sai dai  anan za’a samu yarinyar ta baiwa shekaru 8 baya, wato tana tsakanin shekaru 9 zuwa 11, yayin da ashi kuma namiji zai zamto bayan yaba shekaru 9 baya amma bai kai 14 ba. In kun lura kenan shekaru ne suka bambanta amma duk alamun daya ne.

    Shi ma wannan waccan matsalar ta tangardar halittar da nace itace de kan taka rawa wajen faruwarta anan ma. 

    Toh Saidai Anan Sauran Abubuwa Da Dama Da Akan Alaƙanta Faruwar Hakan Dasu Sune: 
    • Hutun rayuwa da samarwa yaro abunda duk ya nema ko bai nema ba naci ko sha, batare da ana sashi yana motsa jiki ba
    • Ciye-ciyen abinci marasa kyawu ga jiki wato junks foods; irinsu pizza,samosa,burger, dognut da sauran abubuwan zaƙi da maiƙo batare da ana  motsa jiki ba yadda za’a konasu ba, da kuma yaran da ke yawan basu abincin waken suya suna ciki kullum-kullum saboda tasirin pyoestrogen dake kunshe ciki.
    • Da kuma samuwar sabbin hanyoyin girki da dumama abinci na zamani irinsu: ovun, teflone cookwares, nonstick wrappers, chemicals da ake amfani dasu wajen gine-ginen zamani da fenti, rashin kwanciya bacci da wuri ga yaro abarsa yaita kalle-kallen tv ko video game dade sauran abubuwa wanda mukan iya ci, shaƙa ta iska ko sawa afatar jikinsu cikin kayayyakin kwalliyar da ake shafawa yara,
    • Da kuma karikitai da iyaye mata suka duƙufa amfani dasu da sunan karin ni’ima ajika da sassake-sassake na herbal concussion wanda mata basa fasawa koda suna dauke da juna biyu… wanda wani abun na rashin kan gado sai ciki ya samu ma ake farwa… wanda yawanci wannan abubuwan suna da abunda ake kira TERATOGENIC EFFCTS domin suna iya kutsawa shiga mahaifarki inda jariri ke kwance su barshi da illah. 

    Shyasa zakuga ko maganin asibiti in mace nada ciki bakowanne aka yadda tasha ba.  

    Shi yasa ko yaushe nakance mutane susan abu kafin kasa shi jikinka ko cikinka, bawai kurum don kaga kowa nayi ba. Wani zaiji asama na ambaci hadda madarar waken suya ko irinsu awara yai mamaki…. 

    Kya iya kita bawa yarki kuma Allah yasa hakan bai faru ba wannan kuma ya danganta da yadda jikin kowa ke maida martanin abu, domin akwai wanda jikinsa ko ya yaji bakon abu zai canza. 

    Babban misali allurar Kulorokuin ai ba kowa take sawa kaikayi ajika yaita susa ba, wani ko nawa akai lfy zai zauna, wani ko babu lafiya in akai masa, 

    Haka wani zai iya cin gyaɗa ya kwana lafiya wani ko inyaci sai makabarta inbai sami tallafi ba saboda Allergic reaction ko borin jini, wani zaisha ruwan sanyi lafiya, wani inyasha ba lafiya sai tari da mura… zaman lafiya ya kiyayesu, toh haka abun yake.

    Toh duk wadancan canje-canjen bai dace ace sun faru ba kafin kaiwa shekarun da aka saba ganinsu. 

    Domin Mu A Lafiyance Kuma Kimiyance

    Abunda aka saba gani shine; fara bayyanar tasowar nonuwa tsakanin shekaru 11 da haihuwa, da kuma soma haila tsakanin shekara 12 zuwa 14 yawanci a ýaýa mata. kadan ke kaiwa 15 zuwa 16 kafin fara haila.

    Yayin da duk macen da takai shekaru 16 bayan bayyanar nonuwa batare da ta fara ganin haila ba hakan na nuna akwai matsala, ko kuma akaga takai har 15 babu bayyanar nono babu kuma haila… nan ma kwai matsala, kwai buƙatar atuntubi likita.

    Amma ganin yarinya da nonuwa tundaga shekaru 11 wannan duk normal ne saide ace ya dan yi wuri. Wasu ma nonuwan na jinkirin tasawa har sai sun rufe shekara 20 alhalin suna haila, suna da gashi a lokunan jikinsu normal amma kirjin ne kamar anjera kwai wannan ma babu abun damuwa galibi.

    Menene Illar Hakan

    Idan alamun firikoshuyos ya bayyana toh babban mahimmin abun sani shine; Irinn wadannan yaran (Mace ko Namiji) kasusuwansu zasuyi saurin kammala ƙwarinsu tun kafin lokaci yayi wanda hakan ke nuna bazasuyi tsayi ba kamar sauran,mafi yawan mutane matukar ba’a kai musu dauki ba, basa wuce tsayin kafa hudu da ďan wani abu.

    Haka zalik irin wadannan yaran ka iya fuskantar ciwo na rushi saboda damuwa, musamman wasu inba iyaye sun tsaya tsaye ba yan uwansu yara ka iya  tsokanarsu ko yi musu wasan banza

    Matakin Dauka
    • Da farko dai in anga haka ya dace dukkan iyaye da manya agida su fahimci cewa wannan tangarda ce, a taimaka asami lokaci akaisu suga likitan yara wato PEDIATRICIAN a babban asibiti, yayin da likitan yara zai aiki hannu da hannu da likitan sinadaran jiki ENDOCRINOLOGIST wanda dukkansu ana iya samunsu ne a manyan asibitoci wato SPECIALIST, FMC, ko TEACHING HOSPITAL ko kuma asibitocin yaran ma kai tsaye wato PEDIATRIC HOSPITAL
    • Kada iyaye su jahilci wannan al’amari akai ga ganganci cewa za’a cirewa yarinya nonuwa… ko za’a nemo wani mai maganin hausa ko wanzami ya tsagasu a zare… kul don ya rasulillahi musamman iyayen mu na karkara kar ai haka, karma afara irin wannan mugun tunanin,shyasa nake sadaukar da lokacina domin wayar dakai,kusani wajibi ne kanku basai ma’aikacin lafiya ba in kunji ana shirin yiwa irin wadannan yara aika-aika ku tsawatar inkunga da gaske iyayen sunƙi daukar shawara don Allah kaje ka sanar da wani babba agari, ko kuwa jami’an tsaro don tsawatarwa…
    • Kada atsaya baiwa yaran wasu jike-jike ko magungunan shafawa a nonon… Sam babu bukatar haka.
    • Azo ga likitoci kurum, inma a asibitocin karkara ka sami irin wannan case din ka sanar dasu cewa in wannan abune da kunsan yana faruwa amma suyi kokari ga irin asibitin da zasuje kuma za’ai abunda ya dace. Aita wayarma da mutanen mu, saboda yanzu matsalar ta fara yawaita…. kuma hakan bai rasa nasaba da duniyar shaye-shayen tarkacen komi da komi da mata suka dorawa kansu… Domin hatta irin su hulba din nan da kuke rainawa a likitance munsan kwai estrogen cikinta… bai kamata mace me ciki ta rika ta’ammali dasu ba. 
    • In anzo asibiti likitoci zasu bada maganin da zai dakile cigaban saurin alamun balagar… tare da bata maganin da zai hana kasusuwan saurin kwari domin su samu su cimma tsayinsu kamar sauran mutane.
    • A sanya ido akan abokan wasa tare da  mutane daga irin wadannan yaran don tseratar dasu daga tsokana ko cin zarafin mutanen banza cikin al’umma, domin da za’a sadu dasu zasu dau ciki kai tsaye, koda jaririya ce kuwa ta sami wannan yanayin inda za saka mata ruwan halittar namiji ciki zai iya shiga bare wanda suka tasa.

    Dmin karanta Amfani da Kuma Illar Magungunan Kara Karfin Maza (Male Sex Enhancement Supplements ) Danna nan