Ana yin wannan sallah yayin da fari ya afkawa al’ummar musulmi. Ruwa ya yi jinkiri ko ya dakata. Ana yin ta ne raka’a biyu kacal a bayan gari (filin masallicin idi) kamar dai yadda ake yin sallar idi sai dai ita ba a yi mata kabbarori irin na sallar idi.
Ana so kowa ya fito cikin kasƙantar da kai ga Allah, ba tare da an yi ado ba. Cike da tsoron Allah da nutsuwa da nuna nadama. Liman zai yi huɗubar kafin ko bayan idar da sallar, a cikin huɗubar ya yawaita addu’a. ya fuskanci alƙibla ya ɗaga hannayensa sama sosai, ya kifasu, sauran mutune ma kowa ya ɗaga hannnunsa, kuma ana so liman ya juya mayafinsa ko alkyabbarsa ko babbar rigarsa domin fata Allah ya kawo sauyin yanayi.
A cikin huɗubar nan tasa, liman ya ja kunnen mutane ya tsawatar da su kan saɓon Allah da zalunci ya umarce su da su tuba su bai wa masu haƙƙi haƙƙinsu, kowa ya gyara halinsa.
Domin karanta cikakken bayani a kan Sujjadar Tilawa danna nan.
Wannan bayani an ciro shi ne daga littafin Ingantattun Nafiloli Da Falalarsu wanda Usman Abubakar Muhammad (Shehu Mansur Dala) ya wallafa shi domin karanta cikakken littafin danna nan.
