Category: Kiwon Lafiya

Mun samar da wannan ɓangaren ne domin koyar da ilimin yadda ake kula da lafiya a cikin harshen Hausa a sauƙaƙe. Za ku iya kai wa gare su ta hanyar amfani da kwamfutoci ko wayoyin hanu.

wikiHausa ta kowa ce. Kowa zai iya taimakawa da ilimi ko gyara. Bugu da ƙari, kowa na iya amfani da wannan kafa domin koya ko koyarwa.

Me Ke Kawo Warin Jiki?

Shin za ka iya gane shekarun mutum a yayin da yake zaune a gefenka ta hanyar warin jikinsa? Zai iya yiwuwa mutum yana sanye da turare, amma duk da haka za ka iya gano shekarunsa ta hanyar warin jiki. Ta hanyar bincike, an gano yadda ake gano hakan.

Shi dai warin jiki ya bambanta tsakanin kowane mutum. Amma kuma yana sauyawa yayin da mutum ke girma. Wannan na faruwa ne ba kawai saboda muhallin da mutum ke zama ba, har ma da yadda yake cuɗanya da al’umma.

Lokacin da mutum ke ƙarami, warin jikinsa ba ya fitowa sosai saboda rashin aikin gaɓoɓin da ke fitar da zufa yadda ya kamata da kuma ƙarancin ƙananan halittu da ke rayuwa a fatar mutum.

Amma duk da haka, iyaye na iya tantance warin jikin ‘ƴa’ƴansu ƙanana. Wannan warin jiki na ƙara danƙon soyayya da ƙauna tsakanin iyaye da ƴaƴansu. Kuma hakan na rage damuwa ga iyaye, yayin da suke ƙoƙarin sanya yaran nasu farin ciki, domin warin jikin ƙananan yara na da jan hankali sosai.

Sai dai kuma masu jegon da kan yi fama da damuwa sanadiyyar haihuwa, ba su iya tantance warin jikin jariransu. A lokacin balaga, warin jikin mutum kan sauya lokaci zuwa lokaci.

Wannan na faruwa ne sanadiyyar sinadaran da jiki ke fitarwa waɗanda ke haɓɓaka gaɓoɓin saduwa, waɗanda su kuma ke haɓɓaka aikin ɓangaren fatar jiki da ke samar da zufa da kuma maiƙo. Yawancin waɗannan gaɓoɓi na samar da ruwa da kuma gishiri.

Sinadaran Apocrine, masu samar da maiƙo da zufa na fitar da wani wari, wanda ya sha bamban ga kowane mutum. Sinadaran su ne ke samar da maiƙon da ke sanya fatar kai da ta jiki laushi. Sai dai a lokacin da suka cakuɗa da ƙananan ƙwayoyin halittu, sai su riƙa fitar da warin jiki da zai iya damun mu.

Yayin da yaran da ke tasowa ke fitar da wani wari, warin kan canza a lokacin da suka balaga, kuma warinsu na asali kan ɓace, wanda hakan ke sanyawa warin ya sha bamban da wanda iyayensu suka sani tun asali.

Danna nan don karanta gwargwadon shayarwarki gwargwadon kariyarki

Edita; Rumasa’u M. Kallamu

09/01/2025
Tsarin Tazarar Haihuwa Mara Amfani Da Magani

Wannan tsari shi bature ya kira da calendar method ko calendar period wanda akan ƙauracewa saduwa a wasu keɓantattun kwanaki a yayin da ake neman kaucewa shigar juna biyu saboda wasu dalilai.

Wannan hanya ta ‘family planning abin da bincike ya tabbatar shi ne tana da sahihanci na kaso 88-95% cikin ɗari na hana shigar ciki. To sai dai duk da haka Allah yakan iya canja ikonsa koda an yi hakan kuma a samu haihuwa, Amma Insha Allah ba a cika samun ciki ya shiga ba idan aka kiyaye hakan.

A jikin mahaifar mace, (Uterus) akwai wasu abubuwa kamar hannu guda biyu, ɗaya gefen dama dayan kuma gefen hagun wato bututun da ake cewa (FOLLOPIAN TUBE) a turance wanda ta ciki a rarake yake kamar pipe ɗin ruwa… to a can ƙarshe a bakin kowanne follopian akwai wani kwanson abu ƙullutu (Ovary) wanda a cikinsa ne akwai wasu ƙwayaye.

Duk sanda Mace ta yi haila bayan Jinin ya ɗauke da kwanaki 14, wancan abu da muka ambata da ƙullutu yana sakin waɗancan ƙwayayen, waɗanda su ne sinadarin da ake haɗawa a samu ɗa wato juna biyu.

Waɗannan ƙwayaye idan aka sake su sukan biyo bututun su shigo cikin mahaifar mace su yi kwanaki 2 wato awanni 48′ daga nan idan babu abinda ya zo ya taɓa su wato na daga maniyin namiji (sperm) to za su mutu.

Toh sai dai kafin a saki waɗannan ƙwayayen su tafi mahaifa jiran maniyyin domin samar da ciki, akwai abinda Allah ya halitta a cikin mahaifar mace wanda kan zo ya share mahaifarta sosai (estrogen), domin mahaifar za ta yi baƙo, wanda baƙon kuwa shi ne wannan ƙwan.

Akwai wasu jijiyoyi guda biyu na jini, a gefen dama da hagu na mahaifar mace, idan aka zo aka share mahaifar to waɗannan jijiyoyin za su cika da jini sosai, sai su koma ja-ja-wur, suna jiran wannan baƙon da zai shigo mahaifa saboda su yi amfani da wannan jinin da suka cika kansu da shi su ba wa baƙon a matsayin abinci na tsawon awanni 48 da ƙwan kan iya rayuwa.

Wanda in ƙwan ya zarce haka ba tare da maniyyi ya zo ya same shi ba, to lalacewa za yi ya mutu. Shi kuwa maniyyin namiji yana yin kwanaki 3 wato awanni 72 a cikin mahaifar mace kafin ya mutu, saɓanin na mace da ke kwana 2 (48hrs). Idan mun fahimci waɗancan bayanan da suka gabata, to yanzu sai mu haɗa su waje ɗaya mu ga yadda abin yake.

Idan mace ta gama haila da kwanaki 14 to wancan abun mai kamar tiyo wato bututun (follopian tube) da ya haɗe kwanson OVARY zuwa cikin mahaifa (UTERUS) waɗannan ƙwayayen da ke cikin OVARY ta cikinsa suke shigowa cikin mahaifarta su jira maniyyin namiji ya zo ya same su wanda ake kira (OVULATION).

Idan sanda suka shigo mahaifa akai dace namiji ya sadu da mace dama ya zuba mata maniyyi ko da kuwa kwanaki 2 da suka wuce ne aka yi saduwar to komi ƙanƙantar maniyyin nan ya wadatar da su. maniyyin zai zamo musu kamar taki don haka za su baibaye shi su haɗu su yi ta girma babu zancen mutuwa kuma wanda da haka ne kuma Allah zai ta sarrafa shi har ya mai da shi jariri ya zamo mutum.

To idan kuwa sanda ƙwan ya shigo cikin mahaifa babu wani maniyyi da ya shigo gurin a dalilin rashin saduwa da macen da ba ai ba to waɗannan ƙwayayen za su mutu bayan sun yi awa 48 (kwanaki 2) kamar yadda na faɗa a baya cewa ƙwan mace bai wuce kwana 2 zai mutu in bai haɗu da maniyyi ba.

Toh idan kuma suka mutu to za su biyo cikin al’aurar mace sai su fito, shi ne sai ka ji mata na tambayar sukan ga wani abu mai kamar majina-majina yana fito musu a al’aura ta wani lokaci, wanda wannan shi ne abinda ke fitowar ba wai infection ba ne. Kuma in ‘yan mata ne da za ku lissafa za ku ga sanda yake fitowar a ƙalla lokacin kun yi ko kun kusa sati 2 da gama haila.

Wannan yasa malaman mu a misulunci ke cewa babu komai akan wannan abun in mace ta gani kawai ta wanke shi ba shida wani hukunci, ba wanka ake ba. Amma indai ba sau 1 a wata take ganin wannan ba kuma ya zamto ba irin wajen sati 2 ne da gama haila ba to ƙila abinda kike fitarwa wannan yana da alaƙa da INFECTION musamman idan dususu yake ko kuma kika ji ma yana ƙarni.

Duk hakan ya faru ne a dalilin rashin shigar maniyyi da zai girmar da wancan ƙwan, tunda kun ga budurwa dama ba aure gare ta ba.

Dalilin rashin maniyyin bayan ƙwan ya lalace ya fita su kuma waɗancan jijiyoyi da suka tara jini a cikinsu, sai su yi wani abu da ake kira fushi, ba su ji daɗi ba, a dalilin haka sai suke kartar jikin mahaifar mace, sai ka ji mace tace maka tana yawan fama da ciwon mara (lower abdominal pain) musamman idan ta gama Haila. A nan za mu fahimci rashin aure na daga abunda ke jawo wannan, kuma maganin haka shi ne aure duk da akan samu masu auren na fuskantar hakan.

Don karanta lokacin da ya dace mace ta yi amfani da tazarar haihuwa danna nan

Idan karce jijiyoyin nan ya yi yawa kuma aka yi rashin sa’a sai su fashe, idan kuma suka fashe sai jini ya yi ta fita ba tsayawa a wasu, wannan shi ne ake kira da jinin Istihada, daman Manzon Allah (SAW) ya taɓa gayawa wata mata cewar ai wannan jinin na jijiya ne.

Dan haka idan mace me aure ce kuma tana son yin ‘family planning da mijinta, to hanya mafi sauƙi ita ce; kamar yadda muka ji bayan gama hailar ta da kwanaki 14 ake sakin waɗancan ƙwayaye zuwa mahaifa, kuma sukan yi kwanaki 2 kafin su mutu, shi kuma maniyyin namijin yakan yi kwanaki 3 kafin ya mutu. To su ma’auratan kada su yi jima’i tun ranar 11 da gama hailar ta, har sai bayan ranar 17 da gama hailar ta.

Ku ɗan tsaya kaɗan a nan kafin ku cigaba ku yi tunanin me yasa nace haka??

Dalilin hakan kuwa shi ne; ranar 14 ƙwai ke zuwa, to idan suka sadu ranar 12, kada mu manta maniyyi sai ya yi kwanaki 3 kafin ya mutu, to kun ga idan suka sadu ranar 12, maniyyin namijin na nan a mahaifar a raye har ranar 14 da za a sakin ƙwan, zai zauna na tsawon kwanakin 12,13,14 kafin ya mutu, to kun ga za su ci karo ranar 14, kuma babu abinda zai hana shi sarrafa ƙwan nan.

An ce kar ku sadu har sai bayan ranar 17 ne saboda shi kuma ƙwan yakan yi kwanaki 2 kafin ya mutu. To waɗannan kwanaki 5 ɗin-12,13,14,15,16 da gama Hailar mace, su ake kira da ‘DANGER PERIODS’ Ma’ana kwanaki masu hatsari, an kira su da haka ne saboda idan dai aka sadu da mace a waɗannan kwanakin to kuwa tabbas za ta samu ciki, sai dai idan mulkin Ubangiji ya shigo ciki ko kuma in dama cikin ma’auratan akwai larurar da ke hana ɗaukar ciki.

Amma idan har ma’aurata na son yin ‘family planning’ ba tare da sa ko shan komi ba waɗannan kwanakin za su kaucewa saduwa a ciki wato tun daga ranar 11 da gama haila har sai ranar 17 da gama haila, sati 1 kenan.

Sannan kuskuren dakan faru wasu na zuwa da sunan a sadun amma in ya ji zai kawo sai ya zare. Ina mai tabbatar ma wannan ruwan me santsi na maniyyi da kan fara fitowa ka zaci maziyyi ne shi kansa ya wadatar yasa ciki ya shiga domin akwai maniyyi daga ƙarshensa. Wannan tasa ‘yan matan da kan auka tarkon samari ke ƙarewa da ciki a zaton ba ai release jikinsu ba, don haka in dai za a yi to a kiyayi kusanta kurum.

Kuma irin hakan yasa ba a ba hanyar inganci 100% ba domin ko yaya maniyyi yake ya wadatar. Haka kuma wasu matan duk sati 3 suke haila don haka kwanakin fara ovulation ɗinsu ba zai kai har 14 ba, galibi bayan kwana 10 ovulation na iya faruwa, kun ga ita sai dai a ƙaurace mata kwanaki 8 zuwa 13.

Sannan wani abu; a yayin da ƙwan can ke tafiya a cikin FOLLOPIAN TUBE daga ovary zuwa cikin mahaifa idan ya maƙale a hanya kuma aka zo aka sadu da mace toh shi ne maimakon ciki ya kasance a cikin mahaifa sai ya kasance a wajen mahaifa wanda shi muke kira ECTOPIC PREGNANCY. Wanda dole sai dai a yi aiki a cire. Kuma wannan follopian tube ɗin ya samu matsala kenan har abada. Sai dai da yake biyu ne, to ɗaya ya isa ta samu ciki da shi. Wata hikima ta Allah shi yasa ya yi biyun. To inko duk biyun suka ta6u aka kuma samu ectopic to fa shi ne ciki sai dai a yi wa mace dashensa, gaskiya ba za ta iya ɗauka ba.

Wanda Pelvic inflammatory disease na daga kan gaba abinda ke jawo tangarɗar Follopian tube ɗin don haka mata ku daina sake da infection, a kuma daina amfani da wani maganin matsi ko tsarki da ruwan sassake-sassake in kun ƙi kuma to jiki magayi. A kuma lura da tsafta.

Danna nan don karanta yadda za a magance ɓallewar jini bayan haihuwa

Edita; Rumasa’u M. Kallamu

08/01/2025
Amfanin Aya Wajen Samar Da Lafiya A Jiki
Aya ita ake kira “tigernut” ko “chufa” a turance. Aya tana daga cikin nau’ikan ƙananan mabunkura ƙasa (tubers), ko saiwoyi (roots), ko kayan lambu (vegetables). Shekaru aru-aru mutane suna cin aya saboda amfaninta na samar da abinci a jiki (nutritional value) da kuma samar da lafiya a jiki (medicinal value).

Muhimman kayan alatun (ingredients) da suke cikin aya su ne:
1. Dussa (fibre): aya tana ƙunshe da dussa waçce take matsayin abinci, kuma ita ce wannan tuƙar da take ragewa (resistant starch) bayan an taune ta kuma an haɗiye romonta. Maimakon zubar da dussar, idan mutum ya haɗiye ta tana taimakawa wajen narkewar abinci (digestion), samar da ƙoshi (satiety), da kyautata lafiyar tumbi (healthy gut support).
1. Hanyar samar da sinadarin baiwa jiki kuzari (source of carbohydrates): Aya tana da sinadarin kuzarin jiki a matsayin abu mai ɗanɗanon zaƙi a cikinta.
1. Lafiyayyen sinadarin maiƙo (healthy fats): Aya tana ƙunshe da maiƙo ko kitse mai saurin narkewa (monounsaturated fats) da kuma maiƙo mai ɗaukar lokaci kafin ya narke (polyunsaturated fats) kamar “omega 6 fatty acids”. Waɗannan nau’ukan maikon ba su da hatsari ga ayyukan zuciya.
1. Sinadaren gyaran jiki da kuma lafiyar jiki (vitamins and minerals): Aya hanyar samar da sinadaran gyara da lafiyar jiki ce, kamar vitamin C, vitamin E, potassium, phosphorus, magnesium, da iron.
Idan kuma ana maganar amfanin aya wajen magance cututtuka ne, to, sun ƙunshi:
1. Narkewar abinci (digestive health): dussar da take cikinta tana taimakawa wajen narkar da abinci (promoting food digestion), hana kumburin ciki (preventing constipation), da tabbatar da lafiyar tumbi (healthy gut flora maintenance).
1. Daidaita ƙibar jiki (weight management): haɗakar dussa da maiƙon da suke cikin aya tana taimakawa wajen sanya mutum ya ƙoshi, don haka zai rage yawan cin abinci kuma ya daidaita ƙibar jiki.
1. Lafiyar zuciya (heart health): maiƙo mai saurin narkewa (monounsaturated fats) wanda yake cikin aya yana taimakawa ayyukan zuciya domin yana hana taruwar kitsen cholesterol mai cutar da zuciya wanda ake kira “low-density lipoprotein – LDL”, sa’annan ya ƙara yawan kitse maras cutar da zuciya wanda ake kira “high-density lipoprotein – HDL”.
1. Kashe kaifin gubar abinci (antioxidant properties): Aya tana ƙunshe da sinadaren kashe kaifin gubar abinci kamar vitamin E wanda yake magance gajiya (stress) da kuma kumburin gaɓoɓi (inflammation).
1. Rashin bijire ma jiki (allergen-free): Aya tana ɗauke da sinadarin da babu gluten a cikinsa, babu soy a cikinsa, Kuma babu nut a cikinsa. Su sinadaran gluten, da soy, da nut nau’ikan protein ne waɗanda jikunan wasu mutanen suke bijire ma, su sanya musu allergies.
1. Ƙarfafa damar samun juna biyu ga ma’aurata (couple fertility enhancement): aya tana taimakawa maza wajen samun sinadaran gonadotropins, testosterone, da ingantattun ‘ya’yan maniyyi. Ga mata kuwa, tana ƙara ƙarfin sha’awar saduwar aure, ni’ima, da kyautata zaman jariri a mahaifa.
Don haka mu daure mu riƙa sayen aya saboda amfanin kanmu Mazaje ku daure ku rinƙa siyawa iyalanku aya. Sannan yana da kyau ku koyi sarrafa ta wajan yin nau’in abubuwa da yawa kamar su su kunun Aya da sauran su.

Danna nan don karanta amfanin ruwa da lafiya

Edita; Rumasa’u M. Kallamu
08/01/2025
Kwanakin Da Mahaifa Ke Yi Kafin Ta Rufe Bayan Gama Al’ada

Kuskuren da mutane suke yi shi ne suna ɗaukar cewa mahaifar mace buɗewa take yi kuma ta zamo a wangale lokacin da take yin jinin al’ada. A a, abinda yake faruwa shi ne, jinin yana fitowa ne ta bakin mahaifa (cervix), wacce ‘yar ƙaramar ƙofa ce mai kewayayyar siffa (circular shape), faɗinta yana kamawa daga 0.5cm zuwa 1.5cm.

Ƙofar takan buɗe ne kaɗan a daidai lokacin da mahaifar ta takure (compression) domin turo jinin da yake cikinta zuwa waje. Takurewar ita ce take haifar da ciwon mara ko ciki. Da zarar jinin ya gama fita, to, bakin mahaifar zai tsuke, ya jira sai idan jinin ya sake taruwa kuma mahaifa ta sake takurewa domin ya fito, sa’annan ta sake buɗewa.

Misali gwari-gwari yadda za ki gane shi ne yadda ƙofar duburar mutum take buɗewa idan kashi zai fito. Da zarar kashin ya fito, za ta tsuke sai ki sake yin yunƙuri kuma. Daga wannan bayanin za ka iya fahimtar cewa ba maganar kwana nawa ne mahaifa za ta rufe bayan gama al’ada ba. A a, ko yaushe bakin mahaifarta a rufe yake, sai idan jinin al’ada zai fito take buɗewa.

Sa’annan ya rufe da zarar ya gama fitowa, sai kuma wani lokacin. Game da shigar ƙyanƙyasasshen ƙwan haihuwa zuwa cikin mahaifa kuwa, ga yadda abin yake: Jakunkunan ƙwan haihuwa (ovaries) sukan saki ƙwayayen haihuwa (ova) a lokacin da zangon al’adar mace ya kai tsakiya (middle of menstrual cycle). Idan ƙwan ya fito, zai tsaya a cikin bututun ƙwan haihuwa (fallopian tubes) ya jira zuwan ‘ya’yan maniyyin namiji domin su ƙyanƙyashe shi (fertilization).

A cikin ‘ya’yan maniyyin, za a sami guda ɗaya ne wanda zai ƙyanƙyashe ƙwan. Idan kuwa ba a yi sa’ar samun ɗan-maniyyin da ya ƙyanƙyashe shi ba, to, kwan haihuwar zai iya rayuwa ne na tsawon kimanin awoyi 24. Daga nan zai lalace.

Idan kuwa an ƙyanƙyashe shi, shi ake kira “zygote” ko “blastocyst” a likitance. Daga nan ƙyanƙyasasshen ƙwan zai gangara a hankali daga cikin bututun fallopian tube zuwa bakin mahaifa (cervix). Yadda tafiyar take zamowa kuwa shi ne ta hanyar takurewar tsokar bangon bututun fallopian tubes ɗin (fallopian tubes muscular contractions).

Abinda yake sauƙaƙawa tafiyar a lokacin da tsokar take takurewar shi ne bangon bututun yana da waɗansu halittu masu santsi kamar gashi (cilia), wanda santsinsu zai riƙa ingiza ƙwan gaba-gaba (ciliary motion) har zuwa bakin mahaifa.

Don haka, idan ƙwan ya Isa bakin mahaifa, zai tarar da majinar bakin mahaifa (cervical mucus) tana jiransa. Majinar ita ce ruwan ni’ima na bakin mahaifa. To, da zarar ƙwan ya Iso, sai bakin mahaifar ya ɗosano isowarsa. Hakan zai aikewa ƙwaƙwalwa saƙon cewa ana buƙatar ta bayar da umarnin bakin mahaifar ya buɗe domin ƙyanƙyasasshen ƙwan ya shiga cikin mahaifa.

Saboda haka bakin mahaifar zai buɗe, daga nan sai santsin majinar ya taimakawa ƙwan ya shiga cikin mahaifar. Da zarar ya shige, bakin mahaifar zai sake rufewa. Wannan shi ne ake kira “cervical os” wanda sakamakon awon ultrasound scan yakan nuna.

Idan ƙwan ya shiga cikin mahaifa, to zai yi ƙoƙarin maƙalewa a jikin bangon mahaifar (implantation), kuma hakan yana haifarwa mace zubar jini kaɗan-kaɗan (implantation bleeding), wanda yake ɗaukar ‘yan kwanaki. Amma jinin zai daina zuba da zarar ƙwan ya yi nasarar maƙalewa yaddà ya kamata. Duk waɗannan ayyukan suna faruwa ne cikin kwanaki 6 zuwa 10.

Maƙalallen ƙwan zai cigaba da yin girma ta hanyar zuƙo jinin jikin mace mai juna biyun a daidai inda ya maƙale. Kuma maƙalewarsa za ta sanya jikin mai juna biyun ya fara samar da sinadarin “human chorionic gonadotropin-hCG”, wanda tsinken awon ciki na PT, ko awon ciki na jini suke ɗosanowa, har su nuna cewa tana da ciki. Sa’annan daidai wurin da ƙwan ya maƙale, to, a nan ne uwa (placenta) take tsirowa. U.S

Danna nan don karanta hawan jini

Edita; Rumasa’u M. Kallamu

03/01/2025
Hattara Maza

Wasu lokutan mukan karanta ko mu ji labaran da kan ce wani ya mutu yayin jima’i ko yayin gasar wauta akan hakan, musamman daga wani yanki na ƙasar nan ko ƙasashen ƙetare… har wasu cikin mu su yi ta dariya, wasu na mamaki, wasu kuma na faɗin albarkacin bakinsu.

Toh amma a zahiri na lura da yawa ba su fahimci me ke jawo hakan ba, illa iyaka wasu kan yi amfani da slang cewa; Matar ta ƙarar da shi, ko ta fi ƙarfinsa. Iya abinda mutane kan kawo ransu kenan…. Ga layman wanda bai san komi ba shi zai tafi akan ƙila ruwan maniyyi ne mutum ya yi ta zubarwa…har ya ƙare ya kai ga duk ƙarfinsa ya tafi ƙarshe ya mutu. Amma inaaa ba haka karatun yake ba.

Abinda ba ku sani ba ko a tsakanin mata da miji da ke auren sunna jima’i ya kai magidanta da yawa lahira ba tare da sun shirya ba. Kurum wani lokacin matan ne ba sa gane al’amarin, ko kuwa ba su san ya za su bayyana ba, ko kuma su zaɓi rufe sirrin a tsakaninsu.

Shi yasa wani za ka ji ana lafiya ƙalau aka rabu da mutum amma kashe gari da safe ake sanar da rasuwarsa. Amma da za ka bincika wataƙil a daren da zai mutun har kwanciya da iyalinsa ya yi. Don haka maza ku buɗe kunnuwanku da kyau, ku shiga taitayinku, ku san me yake muku ciwo.

BAKI ƊAYA ZAN MAGANA NE AKAN WANNAN JARABAR TA TALLAN MAGUNGUNAN MAGIDANTA

Shan Magungunan ƙara ƙarfin Jima’i walau na Hausa, Islamic chemist ko na Bature haka siddan hauka ne. Wannan maganin ba ya ƙarawa mutum jin sha’awa, shauƙi, ko daɗin jima’i. Abinda kurum yake ma shi ne miƙar da azzakari, sai kuma kan haɗa da jinkirta muku Inzali wato Delay Ejaculation. Wato ya zamto ka jima jikin mace.

Jimawa jikin Mace ko ba shi ne daɗin jima’i ba, Infact a lokacin an sauka ma daga ainihin dalilin jima’in, kurum yanzu kuna yi ne cikin fargabar kar iyalinku, ko farkarku ta yi ƙorafi ba ma don kuna jin daɗin al’amarin ba.

Toh amma abinda ba ku sani ba shi ne gwargwadon yadda kuka jinkirta ba ku kawo ba.. gwargwadon matsi da takurar da kuke sanyawa zuciyarku. A yayin da mutum ke jima’i dama a lafiyayyen yanayi ma adadin bugawar zuciyar mutum na ƙaruwa wato Heart rate.

Normal takan buga sau 60–100bpm a duk minti yayin da ake harkokin rayuwa…. Amma yayin jima’i bugunta kan iya ƙaruwa da kaso arba’in zuwa hamsin wato 40-50% ka ga kenan bugun zuciyar mutum na iya kai wa 140-150bpm wanda gudun ba kaɗan ba ne, tana bugawa tamkar sanda abin tsoro ya rarako ka a guje kake neman tsira.

Shi yasa ka taɓa tambayar kanka me yasa mafi yawan mutane ke mutuwa bayan jima’in?Yayin da ka sha maganin ƙara kuzarin jima’i za ka sami kanka a yanayin da kai kanka za ka ji ƙwaƙwalwarka na nusar da kai cewa ya isa haka, ba abinda kake so illa kai release amma kuma ya ƙi zuwa…

Don haka wannan buƙatar ta ka samu ka kawo don ka huta ba za ta yiwu ba har sai ka ƙarawa zuciyarka matsi wato stress akan matsin da already cikinsa take dalilin maganin da ka sha. Stress kan stress kenan… Dole sai ka sa ta ta yi aiki ɗoriya akan wanda ya wuce wanda take yi…. Toh ka ga a yanayin ne sai dai a ji zuciyar ta tsaya cak wato CARDIAC ARREST.

Sai dai a ce Allah ya ji ƙanka kurum, da safe aiki ya ga makwabta na shirye-shiryen zuwa jana’izarka, kuma wallahi. Wanda kuma zuciyar ta ɗauke pressure ɗin toh shi kuma wajen inzali yake haɗuwa da massive stroke, jijiyar jini cikin kwanyarsa ta fashe.

Don haka ba zancen dole sai ka birge mace, nutsu ka san me kake ciki.

Gara ta kira ka da duk sunan da za ta kira ka, kar ka ji ƙasƙanci, minti 2, minti 3 ya wadatar. Ba gasar cin kofin Olympics ba ne da za ka nuna bajintar burge mutane, wannan abu ne daga kai sai ita, ko awa 2 kake babu wanda ya sani, ba kuma me buƙatar ya sani, amma ran da ka mutu a sama kowa sai ya ji.

Sannan ɗoriya akan haka musamman ga wanda suke sama da shekara 50 ina gargadinku da kar ku kuskura ku ce wai ku sai kun birge mace da har za ku je kuna ɗebe-ɗebe musamman yadda hawan jinin nan ya lalata mutane da yawa, za ku haɗu da mummunan bugun zuciya.

Ko matar da ka je ka hallaka kanka a kanta wallahi daga baya wani za ta je ta aura, in ma kai sa’a dama kai kaɗai ɗin ta tsarewa mutuncinta kenan tun kana raye. Don haka ku yi nazari kan wannan.

Don karanta rashin jini a jiki danna nan

ABIN DA BA KWA LURA

Mafi yawan mata daga cikin mu nan gamsuwar su ba a tsawon lokacin da ka ɗauka jikinmu ba ne, Eh kana iya jimawa mu ji daɗi amma ba ta hanyar shan magunguna ba, kwai hanyoyi da yawa da za ka jima ba lallai Sai ka sha magani ba, ku lura da ita, ka saurare ta, ka laƙanci duk wani sashi da take da rauni in ka taɓa ta ta nan, da haka za ka birge ta, ka yi tsafta, ka iya magana, ya zamto ana haɗa gado wajen bacci ba lallai sai yayin da ake buƙatar juna ba, banda fushi, banda ƙullata a rai, duk sanda ake da matsala a tattauna kar ku ɓoye alhalin a ranku kuna jin haushin juna, in kuka kiyaye wannan ba ku da matsala.

Uwa uba wani raunin azzakarin daga hormone ɗinsa ne, don haka hormone replacement therapy yake buƙata ya magance matsalar sa in ma gaban ne bai miƙewa da sauransu, wani ciwon suga gare shi ya lalata nerves da blood supply na mararsa… Shi yasa ba ya iya jima’i…ka ɗebi wannan shirmen magungunan ka ba shi ba dole ya mutu ba dama ga zuciyarsa kullum danƙare da sigar.

In kana da matsala tafi asibiti likita ya ganka ya duba ka ya ba ka maganin da ya dace shi ne zaman lafiya, amma kiyaye zuwa Chemist da ka, ko wajen masu maganin gargajiya ko Islamic chemist, Ku kiyayi kanku tun kafin zuciyarku ta zamo WEAK ku mutu a banza.

Allah yasa mu dace. A yi hattara.

Danna nan don karanta mata ku ba ni kunnenku

Edita; Rumasa’u M. Kallamu

02/01/2025
Sinadarin Ka-Fi Sugar (Artificial Sweetners)

Sinadarin ka-fi-sugar shi ne ake kira “artificial sweeteners” a turance. A likitance kuwa ana kiransa “non-nutritive sweeteners” ko “non-caloric sweeteners”. Sinadarin ka-fi sugar yana samar da ɗanɗano mai matuƙar zaƙi a baki, wanda ya fi na sugar wacce muka sani (sucrose), don haka ne ma ake yin amfani da shi a maimakon sugar. Ita sugar ta asali tana ƙunshe da sinadarin kuzari wanda ake kira “calorie”.

Ana samun calorie ne a cikin rukunnan abinci ko abin sha daban-daban, kamar abinci mai samar da kuzari (carbohydrates), abinci mai sanya girman jiki (proteins), abinci mai tara kitse a cikin jiki (fats). Idan mutum ya ci abinci mai ɗauke da calories, to, jikinsa zai sarrafa calories ɗin domin samar da kuzarin yin ayyukan yau-da-kullum (energy). Kuma calories ɗin ne suke taruwa su zamo taiba (obesity) a jikin mutum, musamman idan ba ya yin ayyukan motsa jiki (physical exercise).

Amma shi sinadarin ka-fi sugar ba ya ƙunshe da calorie ko ɗaya a cikinsa. Sinadaren zaƙi da suke cikinsa ana samunsu ne daga ruwan sinadaren kimiyya (chemicals) waɗanda ake sarrafawa a cikin ɗakin binciken kimiyya (laboratory), ko kuma tsirrai (plants) amma waɗanda aka sarrafa a ɗakin kimiyya.

Danna nan don karanta yadda ake haɗa sinadarin bleach

NAU’O’IN SINADARIN KA-FI SUGAR

Akwai nau’o’in sinadarin ka-fi sugar waɗanda ake yin amfani da su a ƙasashen duniya daban-daban, ko dai a gidaje, ko kuma a kamfanonin sarrafa abinci da abin sha. Kaɗan daga cikinsu su ne:

. Allulose: ana tatso shi ne daga cikin ɓaure (fig), alkama (wheat), da zabibi (raisins). Yana da zaƙi fiye da sugar wacce muka sani (sucrose) da kaso 70%. Duk da zaƙinsa, allulose ba ya haifar da taruwar kitse a cikin jiki, domin ba ya narkewa ya bi jiki. Ma’ana, mutum zai fitsarar da shi ne ko kuma ya yi kashinsa yadda ya sha shi.

. Acesulfame potassium: wanda ake kira da suna “Ace-K”, ana samun sa ne daga sinadarin potassium wanda aka sarrafa a ɗakin kimiyya na laboratory. Yana da zaƙi fiye da sugar wacce muka sani (sucrose) da kaso 200%. Duk da zaƙinsa, acesulfame potassium ba ya haifar da taruwar kitse a cikin jiki, kuma hukomomin kula da ingancin magunguna da abinci na duniya sun amince da a yi amfani da shi a cikin abinci.

. Aspartame: ana samun sa ne daga sinadaran amino acids guda biyu masu suna “aspartic acid” da “phenylalanine” wanɗanda aka sarrafa a ɗakin kimiyya na laboratory. Yana da zaƙi fiye da sugar wacce muka sani (sucrose) da kaso 200%.

Duk da zaƙinsa, aspartame ba ya haifar da taruwar kitse a cikin jiki, kuma hukomomin kula da ingancin magunguna da abinci na America (Food and Drug Administration – FDA) da na ƙasashen turai (European Food Safety Authority – EFSA) da Nigeria (National Agency for Foods and Drugs Administration and Control – NAFDAC) sun amince da a yi amfani da shi a cikin abinci. Sai dai, mutanen da ba su da sinadarin phenylalanine hydroxylase (PAH) a cikin jikinsu wanda yake taimakon hanta wajen narkar da abinci, bai kamata su yi amfani da shi ba, saboda rashin sinadarin zai sanya hanta ta kasa yin aikinta na narkar da abinci.

. Cyclamate: ana samunsa ne daga haɗakar sinadaran “cyclohexylamine” da “sodium” da “calcium” wanɗanda aka sarrafa a ɗakin kimiyya na laboratory. Yana da zaƙi fiye da sugar wacce muka sani (sucrose) da kaso 30% zuwa 50%. Duk da zaƙinsa, cyclamate ba ya haifar da taruwar kitse a cikin jiki, kuma hukomomin kula da ingancin magunguna da abinci na ƙasashen turai sun amince da yin amfani da shi.

Amma America ba ta amince da shi ba saboda zargin da aka yi a shekarar 1969 cewa cyclamate yana da hatsarin haddasa cutar cancer ta mafitsara (bladder cancer). Tun daga wannan lokacin, masana sun yi bincike daban-daban domin tabbatar da zargin. Sakamakon wasu daga cikin binciken ya karyata zargin, sa’annan sakamakon wasu bincikin ya tabbatar da zargin. Don haka har yanzu hukumar FDA ba ta ɗauki matsayi ba akan yin amfani da shi.

. Mogrosides: ana samunsa ne daga itaciyar “monk fruit” wacce ake samun ta a ƙasar China da Thailand, kuma suna kiransa “Luo Han Guo”, Yana da zaƙi fiye da sugar wacce muka sani (sucrose) da kaso 150% zuwa 250%. Duk da zaƙinsa, mogrosides baya haifar da taruwar kitse a cikin jiki, domin baya narkewa ya bi jiki. A shekarar 2017, wani kamfanin Chinese ya nemi EFSA da ta yi bincike a kansa, kuma daga nan aka tabbatar da ingancinsa a America da Australia.

. Saccharin: ana samunsa ne daga sinadarin “toluene” wanda ake samunsa daga gurɓataccen man petroleum kuma aka sarrafa a ɗakin kimiyya na laboratory. Yana da zaƙi fiye da sugar wacce muka sani (sucrose) da kaso 200% zuwa 700%. Duk da zaƙinsa, saccharin ba ya haifar da taruwar kitse a cikin jiki, domin ba ya narkewa ya bi jiki.

An yi muhawara mai zafi a kan ingancin yin amfani da shi a cikin abinci a ƙasar America a shekarar 1970 saboda zargin da aka yi na cewa saccharin yana da hatsarin haddasa cutar cancer ta mafitsara. Amma duk binciken kimiyya da aka yi bayan wannan lokacin ba su tabbatar da zargin ba don haka, hukumomin kula da magunguna da abinci na duniya suka amince da yin amfani da shi.

. Steviol glycosides: ana samunsa ne daga itaciyar “Stevia rebaudiana” wanda ake samunta a ƙasar South America da Japan. Yana da zaƙi fiye da sugar wacce muka sani (sucrose) da kaso 200% zuwa 400%. Duk da zaƙinsa, steviol rebaudiana ba ya haifar da taruwar kitse a cikin jiki, domin ba ya narkewa ya bi jiki.

A shekarar 1987, hukumar FDA ta America ta hana yin amfani da shi saboda zargin cewa yana haddasa cutar cancer ta mafitsara. Amma bayan yin nazari mai zurfi daga masana, FDA ta amince da yin amfani da shi a watan December na 2008.

. Sucralose: ana samunsa ne daga sinadarin “sucrose” na sugar wacce muka sani wanda aka sarrafa a ɗakin kimiyya na laboratory. Yana da zaƙi fiye da sugar wacce muka sani (sucrose) da kaso 400% zuwa 700%. Duk da zaƙinsa, sucralose ba ya haifar da taruwar kitse a cikin jiki, domin ba ya narkewa ya bi jiki.

A shekarar 2005, ƙungiyar kamfanoni masu yin sugar a America sun yi ƙoƙarin ɓata wa sucralose suna da zargin cewa yana da hatsari ga lafiyar mutum. Amma daga baya kotuna sun sanya an yi bincike an tabbatar da rashin gaskiyar wannan zargin, don haka hukumomin duniya suka amince da yin amfani da shi.

. Sugar alcohols: ana kiransa polyols, ana samunsa ne daga sinadaran ’ya’yan itatuwa. Sinadaran su ne:

(a) Xylitol wanda ake samu a cikin berries, plums, da corn husks

(b) Erythritol wanda ake samu a cikin grapes, melons, da pears

(c) Sorbitol wanda ake samu a cikin apple, pears, peaches, cherries, carrots, sweet potatoes

(d) Mannitol wanda ake samu a cikin seaweed, mushrooms, watermelons, pineapples

(e) Maltitol wanda ake samu a cikin wheat, corn, potatoes

(f) Isomalt wanda ake samu a cikin sucrose.

Domin karanta muhimman abubuwan da suke inganta lafiya danna nan

Edita; Rumasa’u Muhammad Kallamu

19/12/2024
Haifo Jarirai Cikin Rigar Sac

Haƙiƙa akan haifo wasu yaran cikin amniotic sac ba tare da ta yage iya yaran sun fito ba. Yana da kyau mu fahimta faruwar hakan ba wani matsala ba ne, a cikin cikin ita wannan sac ko in ce jakar haɗe take da jikin mahaifa ita ce ke samar wa da jariri iska sanda yake cikin mahaifa (placenta).

Amma a yayin da haihuwa ta zo ita sac ɗin kan yage ta yadda hakan ke ba wa huhun jariri (lungs) damar fara ɗaukar iska da kansa, maimakon sac ɗin da da take ba shi.

Hatta a asibiti wasu ba ta yagewa jami’an lafiya ne ke farka ta da hannunsu ba tare da kowa ma ya sani ba sai dai ku ga jaririn kurum.

Don haka haifo su cikin sac ba matsala ba ne. Allah yasa mu gama haife-haife lafiya.

Danna nan domin karanta yadda ake yi wa jarirai huɗubar haihuwa

Edita; Rumasa’u M. Kallamu

17/12/2024
Gwargwadon Shayarwa Gwargwadon Kariyarki

Matan da kan shayar na da ƙarancin yiwuwar haɗuwa da cutar sankarar nono wato ‘breast cancer’ da ƙarancin haɗuwa da kansar kwanson ƙwayayen halitta wato ‘ovarian cancer’, ƙarancin haɗuwa da ciwon zuciya, cutar shanyewar ɓarin jiki, haɗuwa da ciwon sugar tare da samun kariya daga cutar damuwa da kan shafi wasu matan bayan haihuwa.

Gwargwadon tsayin lokacin da kika ɗauka kina shayarwa gwargwadon kariyar da za ki samu daga waɗancan cuttukan, wacce ta shayar da yaro iya wata 12 kacal ba za ta sami kariya kamar na wacce ta shayar tsawon watanni 18, shekara 2 ko 3 ba.

Haka gwargwadon tsayin lokacin da kika ɗauka kina shayarwa gwargwadon lafiyar yaro ko yarinyar ki, duk me son lafiyayyar zuri’a to ya shayar na ɗan lokaci me tsawo.

An yi abin ne don a shayar ba domin a yi ado kurum ba.

Danna nan don karanta sankarar nono

Edita; Rumasa’u Muhammad Kallamu

17/12/2024
Abubuwan Da Suke Haifar Da Mura Wacce Ba Ta Warkewa (Causes Of Chronic Rhinitis)
Mura ita ake kira “cold” a turance. Ƙwayoyin cutar virus su ne suke haddasa mura. Amma yana da kyau mu fahimci cewa akwai ƙwayoyin cutar virus daban-daban waɗanda suke haddasa mura, wasu suna sanya mura maras tsanani, wasu kuma suna haifar da mura mai tsanani.

Misali ƙwayoyin cutar mura su ne: rhinoviruses mai haifar da mura ta yau-da-kullum, corona viruses mai haifar da mura mai tsanani da sarƙewar numfashi, respiratory syncytial virus (RSV) mai haifar da mura ga ƙananan yara, adeno viruses mai haifar da sarƙewar numfashi da ciwon ciki da ciwon ido, entero viruses mai haifar da zazzaɓi, human parainfluenza viruses (HPIV) mai haddasa tsananin zazzaɓi ga yara ƙanana, metapneumo virus mai kama yara ƙanana da manya da kuma haifar da sarƙewar numfashi tare da zazzaɓi.

Yawanci cututtukan da ƙwayoyin virus suke haddasawa ba su da magani na kai-tsaye. Ma’ana, babu maganin da mutum zai sha domin magance su na din-din-din (complete and permanent cure), sai dai a shawo kansu su lafa ƙwarai ta yadda ba za su iya yin tasirin haifar da rashin lafiya a cikin jikin mutum ba.

Misali, idan mutum yana da cutar HIV/AIDS, har yanzu ba a gano maganin cutar na din-din-din ba, sai dai a ɗora shi akan magungunan da za su kashe kaifin ƙwayar cutar har ta zamo ba ta da tasirin cutar da shi ko abokan zamansa (antiretroviral therapy).

Haka nan ƙwayar cutar hanta (hepatitis virus), ba ta fita daga cikin jikin mutum gaba-ɗaya, sai dai ta yi sauƙin da ba za ta iya haifar masa da matsala ba ko kuma abokan zamansa, matuƙar an yi masa allurar riga-kafinta kafin ta kama shi, ko kuma maganinta bayan ta kama shi.

Ita ma cutar mura haka take, lafawa yake yi, ma’ana magungunan mura ba su kashe ƙwayar cutar mura kwata-kwata. Abinda suke yi shi ne su magance alamomin da mura take zuwa da su (symptomatic treatment or supportive care). A nan ina nufin abubuwan da magungunan mura suke warkarwa su ne ciwon kai, toshewar hanci, zazzaɓi, tari, ciwon ido, da sauransu.

Amma ba ƙwayar cutar virus ta mura suke magancewa ba. Kuma ƙwayoyin cutar virus na mura sun fi hayayyafa a lokacin da mutum yake yin zirga-zirga, amma da zarar ya kwanta wuri daya, to, za su rage hayayyafa. Wannan shi ne babban dalilin da yasa yawanci magungunan mura suke ƙunshe da sinadaran kashe jiki ne (sedative agents), kamar diphenhydramine ko chlorpheniramine.

Sa’annan, abin lura shi ne, a lokacin da mutum ya kasance yana fama da mura na tsawon lokaci ta ƙi ci ta ƙi cinyewa, to, abubuwan da za su iya haddasa hakan su ne:
1. Kamuwa da ciwon mura mai tsanani (chronic rhinitis) ko kuma cututtukan bututun hanci (nasal passages issues).
2. Kamuwa da cutar asma (asthmatic attack) ko bijirewar hanci sakamakon yin mu’amala da wasu abubuwa da suke jawo mura akai-akai (allergies), kamar mu’amala da ruwan sanyi, ko ƙanƙara, ko iska, ko ƙura, ko hayaƙi, ko turare, ko yaji, da sauransu.

3. Matsalar raunin garkuwar jiki (weak immune system) sakamakon kamuwa da wasu cututtuka na daban, wanda hakan yake sanya garkuwar jiki ta kasa dakushe kaifin ƙwayar cutar mura.

Saboda haka, idan mutum ya ga yana fama da cutar mura, kuma ya ga duk maganin da ya sha ba ya warkewa na dogon lokaci sai murar ta dawo, to, sai ya lura da abubuwan da yake yin mu’amala da su yau-da-kullum. Idan ya gane abinda yake haddasa masa murar, to, sai ya daina yin mu’amalar da su. Kenan mutum ba ya buƙatar yin amfani da wani magani.

Idan kuwa bai gane ba, to, yana da kyau ya je asibiti domin ganin ƙwararren likitan kunne da hanci da makogoro (Otolaryngologist), saboda ya yi masa gwaje-gwaje ya tabbatar da abinda yake faruwa da shi.

Danna nan don karanta Larurar Sanyin Gaba (Genital Infaction)

Edita; Rumasa’u Muhammad Kallamu
13/12/2024
Ni’imar Da Allah Ya Yi Wa Mutane Ba Tare Da Sun Fahimta Ba

Akwai takaici ka ga mutum koyaushe abinda ya rasa shi ya fi damunsa, da shi yake ƙorafi a rayuwa. Ba nazari, babu tunani akan me Allah ya ba shi. Shin ko kun san yayin wankin ƙoɗa (hemodialysis) manya-manyan kawunan allura ne masu zafin gaske da sanya hawaye ƙwaya biyu ake turawa mutum a jijiyar jininsa, wani ma saboda rashin kyawun jijiyoyin sai dai a saita masa a jijiyar jinin wuyansa kai tsaye.

Wannan wankin yana ɗaukar awoyi 4 ana yi mutum na kwance ba tare da ya motsa ba (immobilized) kafin a kammala, kuma mutum na buƙatar a maimaita hakan sau uku “3” dukkan satin duniya. Adadin sau goma sha biyu ’12’ a wata.

Ga wahala, ga shi duk yi ana buƙatar sai wani ya ba ka gudummawar jini, ga zaman jira, wasu tun safe amma saboda layi da sarƙaƙiyar kayan aikin sai biyun dare za su bar asibiti zuwa gida, kuma a haka jibi za su dawo. Ga yawan mantuwa da zazzaɓi, kasala, tashin zuciya, ciwon kai da sauran side effects saboda chemical ɗin tace jinin.

A ƙayyade dukkan wanki sai mutum ya biya kuɗin da suka kai dubu ashirin zuwa talatin N20,000 – N30,000. Wanda tunda sau uku ake a sati, wani ma sau huɗu za a yi, kuma huɗun shi ne ideal wanda jimilla zai kama dubu tamanin zuwa ɗari da ashirin duk satin duniya N80,000 – N120, 000.

A wata zai kama dubu ɗari uku da arba’in zuwa dubu ɗari hudu N340,000 – N400,000. Ko yaushe sai ka shafe awa 4 a kwance ba ka motsi har a gama, adadin awa 48 a wata ba tare da motsi ba, kuma zagaye ne ɗaya.

AMMA ga kai wanda Allah ya yi masa baiwar lafiya, ya horewa ƙoda me lafiya kullum sai Allah ya wanke maka ita sau 36 free of charge, ba ka biya kowa ko sisi ba. Wanda in biya za ka yi dubu talatin sau 36 sai ka biya MILIYAN ƊAYA DA DUBU tamanin – N1,080,000 kullum na abinda Allah ke yi maka a wankin ƙoda kurum banda sauran ni’imomi.

Amma don ka tashi ka ji ka lafiya sharr kai ta wulaƙanci da rashin mutunci, kana jin kai wata tsiya ne, ko kuwa don ba ka da ko sisi kana ganin kamar Allah bai ƙaunarka… Kai bayin Allah yaushe za mu hankalta ne?

Wannan tasa nake bamu shawarar yin check up, kana iya shekara 5 da ciwon ƙoda a hankali bai bayyana ba sai ta gama rikicewa baki ɗaya sannan ka fara jin alamomi, shi yasa ɗazu nace mu daure a je a yi awo ko da sau 1 ko 2 a shekara.

Wallahi duk gatanka ka kiyayi wannan ciwon domin sai an gaji da kai, masu ba ka jini ma in za ai wankin wataran sai an rasa, komi yawan danginka, balle a ce ba ka da kirki dama. Dama a duniya ba abu me ƙaranci irin jini, duk mutum 10 za ka samu 9 a ciki ba wai ya wadace su ba ne.

Kuma ba za a taɓa yi maka dashen ƙoda kai tsaye ba komai gatanka, dole sai ka biyo ta dialysis har ta jikinka ta ƙarasa lalacewa tukunna, domin inba haka ba ko an sa maka wata ba zama za tai ba.

A rage son kuɗi a dinga check up. In ka yi wasa za ka ga wasa. Mu cigaba da godewa Allah a kodayaushe.

Danna nan don Karanta amfanin shan ruwa da safe kafin a ci komai

Edita; Rumasa’u Muhammad Kallamu

11/12/2024