WikiHausa

Tag: Amfanin

  • Amfanin Ilimin Kwamfuta

    Amfanin Ilimin Kwamfuta

    Abu ne mai matuƙar mahimmanci akan kowane mutum ya iya sarrafa tasarrafin ragamar kwamfuta (na’ura mai ƙwaƙwalwa) ta hanyoyi da dama, domin yin ninƙaya a cikin ko ina a duniya ta hanyar karatu ko kasuwanci ko sadarwa. Haka kuma kwamfuta ana iya amfani da ita wajen  ganin yadda ran mutum yake fita da sauran su.

    Kwamfuta na da amfani da yawa tun daga yara ƙanana har  zuwa manya. Kowace masana’anta na buƙatar kwamfuta, don gudanar da ayyukanta cikin sauƙi. Yin amfani da kwamfuta mai inganci zai haifar da ci gaban duniya  baki ɗaya. Kwamfuta na ɗaya daga cikin manyan abubuwan da mutum ya ƙirƙira.

    Sannan kuma ba zai  yiwu ba ga mutum ya  yi hasashen yanayi ba tare da amfani da kwamfuta ba. Na’urorin kwamfutoci suna sauƙaƙa ayyuka da dama, saboda suna iya sarrafa bayanai da yin wasu ƙididdiga waɗanda za su ba da sakamakon abin da ake buƙata.

    Kwamfuta tana amfani ta ɓangaren sadarwa ko shigar da bayanai ta ɓangarorin daban-daban, tana ba da manya da ƙanana harkar  kasuwanci tare da kayan aikin da ake buƙata, don dai-daita mahimman ayyuka kamar ajiyar kuɗi da ƙirƙirar takardu. Har ila yau, su ne maɓalli a cikin masana’antar tallace-tallace, inda suke taimakawa wajen sarrafa kaya daga shigarwa zuwa fitar su.

    Don karanta me ake yi da kwamfuta danna nan

    Edita; Rumasa’u Muhammad Kallamu

  • Amfanin Ƙaho

    Amfanin Ƙaho

    Taƙaitaccen Tarihin Ƙaho:

    Ƙaho, abu ne mai asali da tarihi a Musulunci, domin kuwa, tun kafin yin hijira daga Makka zuwa Madina da kamar shekara guda a lokacin da aka yi Isra’I da Mi’iraji da Annabi (Sallallahu Alaihi Wasallam) Mala’iku masu yawa sun nusar da Manzon Allah (Sallallahu Alaihi Wasallam) da yin amfani da ƙaho da kuma bashi muhimmancin gaske. Don haka, Manzo (SallallahuAlaihi Wasallam) ya yi ƙaho; kuma ya biya wanda ya yi masa ƙahon lada.

    Matsayin Ƙaho:

    Ƙaho abu ne da yake da babban matsayi da gagarumar falala, wanda har hakan ya sa Manzo (Sallallahu Alaihi Wasallam) ya ce: “Ƙaho ne mafi alherin abin da mutane suke yin magani da shi”.

    Ranakun da Ake Yin Ƙaho a Cikin Wata:

    Ga mai son ya ci cikakkiyar gajiyar yi ƙaho, to, ya yi shi a ranar sha bakwai (17) ko sha tara (19), ko kuma ranar ashirin da ɗaya (21) ga watan shekarar Hijira. Manzo (Sallallahu Alaihi Wasallam) ya ce: “wanda ya yi ƙaho a ɗaya dagacikin waɗannann ranakun; da izinin Allah ƙahon zai zamar maganin duk wata cuta”.

    Ranakun da Ake Yin Ƙaho Cikin Sati:

    Ga mai son ya yi ƙaho a ranakun da suka dace daga cikin ranakun sati, to ya yi a ɗaya daga cikin waɗannan ranaku uku masu zuwa: Ranar Litinin, Talata da Alhamis.

    Ranakun da ba a Yin Ƙaho a Cikinsu a Sati:

    An karɓo Hadisi daga Abdullahi ɗan Umar, Allah ya yarda da su, ya ce: “Manzon Allah (Sallallahu Alaihi Wasallam) ya ce: “Ku nisanci yin ƙaho a ranar Laraba, da Juma’a, da Asabar da kuma ranar Lahadi…”.

    Fiyayyen Lokacin da Ake Yin Ƙaho a Cikinsa:

    Yin ƙaho da safe kafin Karin kumallo shi ne fiyayyen lokacin da ake yin ƙaho a cikinsa.
    Guraren da Ake Yin Ƙaho
    Ana yin ƙaho a sassa daban-daban na iki, kamar yadda aka rawaito cewa, Manzon Allah (Sallallahu Alaihi Wasallam) ya yi ƙaho a ƙafa da kafaɗu da gyaffan wuya ko mahaɗar wuya da baya, kuma ya yi ƙaho a ka.
    Kuma ana iya gudnar da ƙaho a wasu guraren daban daga waɗanda aka ambata a sama, gwargwadon buƙata.

    Amfanin ƙaho:

     Ƙara hankali.
     Ƙara kaifin hadda.
     Maganin cututtukan jiki.
     Rage yawaitar jinni don daidaita gudanarsa
     Rage maiƙon cikin jinni
     Maganta matsanancin ciwon kai.
     Rage yawan majinar jiki.
     Kara wa sinadaran yaƙar cututtukan jiki ƙarfi
     Raba jiki da guba

    Wannan bayani an ciro shi ne daga littafin A Kula Da Lafiya wanda Abubakar Abbas Ibrahim ya wallafa shi. Domin karanta cikekken littafin danna koren rubutun nan.