Yadda Ake Katse Mutane Idan Kuna Magana Cikin Ladabi

0
1060

Idan aka fara  tattaunawa da mutane da yawa, kowa kan so ya tofa albarkanci bakinsa. Amma, ta yaya za ka iya katse mutane idan kuna magana cikin ladabi, ba tare da ɓata wa kowa ba?

Tattaunawar  da mutane da yawa a lokaci guda, abu ne mai wuyar sha’ani, kama daga wanda za ka ga hankalinsa baya wajen, zuwa ga waɗanda suka iso daga baya, amma suke tambayoyin da tuni an bayar da amsoshinsu.

Sai dai kuma, abin da ya fi komai wuya a irin wannan tattaunawar shi ne, yadda za ka samu ka ce wani abu. Ga shi kuma mutane da yawa na son a ji ta bakinsu.

Tambayar a nan ita ce, yaya za ka iya yin magana ba tare da ka ɓata wa kowa ba?

Yin magana

Abdullahi Uba Chamo, ɗan ƙasar Nijeriya ne ɓangaren dake amfani da harshen Hausa, wanda yake aikin kula da mutane a cikin jirgi yayin tafiya a sararin samaniya (Cabin Crew) a Birnin Kano ta ƙasar Nijeriya. Ya ce katse mutane ya zama dole; “Babu yadda ka iya, sai ka yi.”

Duk da haka, akwai dabarun da yake bi kafin ya katse mutane.

Na farko dai, ka tabbatar kana da kwakkwaran dalilin da yasa ka yi kutsen, in ji Richie Frieman, marubucin littafin kyakkyawar mu’amala a zamanance mai suna “REPLY ALL… And Other Ways to Tank Your Career”.

Dalilin na iya zama na ƙoƙarin iza mutane su yanke hukunci, tattara bayanin matsayar da aka cimma ko kuma ware waɗansu bayanan da za a tattauna a kai nan gaba. Mataki na biyu shi ne, ka saurari yadda sauran mutane ke katse wasu domin fahimtar hanyoyin da su ka karɓu wurin mutanen da kake tattaunawar da su.

Kar ka bada kunya

Da zarar ka katse mai magana, to kowa zai mai da hankali gare ka, don haka kar ka yi abin kunya.

“Ka tabbatar maganar da za ka faɗa mai muhimmanci ce. Ba wai kawai  na amince da wane ba'”. Idan kutsen naka na da ma’ana, zai fi saurin samun karɓuwa.

“Na kan ji haushi idan wani ya ce, ‘Ina ga ya isa haka’… Wannan wulaƙanta mai maganar ne,” in ji Abdullahi Chamo. Duk lokacin da ka nuna gudunmawar wani ba ta da amfani, za a kalle ka a matsayin mara mutunci.

Domin kaucewa haka, akan katse mutane ne a hankali, tare da gode wa mai maganar bisa batutuwan da yake faɗa.

Daga nan ya karkata akalar hirar ta yadda wancan mai surutun ba zai ci gaba da zuba ba. Yakan ce, “Wannan maganar taka na da muhimmanci, kuma za mu iya tattauna ta nan gaba, kasancewar yanzu lokaci na neman ƙwace mana.”

Togaciya

Wani lokacin da yake da sauƙin cusa baki, shi ne, idan mutane suka fara magana a tare ba mai jin ta wani, ko kuma lokacin da aka yi tsit. “Ba wanda zai ga laifinka, don ka yi ƙoƙarin cewa wani abu a lokacin da kowa ya yi shiru.”

Ko kuma ka yi dabarar yin togaciya tun kafin a fara tattaunawar. Bayyana musu cewa idan na ga maganar da ka kawo ta fita daga hurumin abin da muke tattaunawa zan iya ce maka  ba yanzu ba, sai dai karo na gaba’. Wannan togaciyar, kan taimaka wa mutane su amince da duk wani kutse da za ka yi musu a lokacin da kuke tattaunawar.

Da cewa: “Togaciya, kan sa mutane su fi sakin jiki idan an katse su.”

labarin da ya wuceIlimi Hasken Rayuwa.
Labarin na GabaYadda Zan Gane Ina Da Ciki (juna biyu)

YI SHARHI

Yi haƙuri ka yi sharhinka kai ma.
Yi haƙuri ka rubuta sunanka a nan